As jou kind “enigiets kan doen” – hoe kies jy dan ʼn loopbaan?

Deur Maryna Eksteen

ʼn Groot deel van ouerskap is om jou kind te help om hul plek in die wêreld te vind. Maar wat gebeur as die psigometriese toetse wys dat jou kind nie net een duidelike aanleg het nie, maar ʼn wye reeks sterkpunte? Hulle is byvoorbeeld talentvol in taal én logika, kreatief én gestruktureerd, mens- én taakgeoriënteerd. Hoe kies jy dan ʼn loopbaan?

Baie ouers voel verlig wanneer hulle hoor hul kind het ʼn “breë aanleg”. Dis natuurlik iets om voor dankbaar te wees – jou kind het opsies. Maar dit kan ook oorweldigend wees. Sonder ʼn duidelike rigtingaanwyser is dit maklik om in eindelose moontlikhede vas te val.

Psigometriese toetse is nuttig – dit bied insig in jou kind se aanleg, persoonlikheid en belangstellings. Dit bied egter nie ʼn finale antwoord nie. Veral by kinders met breë vermoëns, is die toets meer van ʼn landskapskaart as ʼn navigasiestelsel. Dit wys wat moontlik is, maar nie watter pad die beste is nie.

Kyk na passie en volharding

ʼn Breë aanleg beteken dat jou kind enigiets kan doen – maar hulle wil nie noodwendig enigiets doen nie. ʼn Goeie vraag om te vra is: waaruit put hulle energie? Watter soort aktiwiteite is vir hulle volhoubaar sonder dat jy hulle hoef aan te spoor?

Loopbaanbesluite word dikwels deur buite-invloede oorskadu: Wat is gewild? Wat betaal goed? Wat sê die familie? Tog weeg passie en volharding dikwels swaarder as aanleg alleen wanneer dit by langtermynsukses en tevredenheid kom.

Kies eerder ʼn rigting as ʼn eindbestemming

As jou kind die potensiaal het om op verskeie terreine uit te blink, kies dan eerder ʼn rigting as ʼn finale beroep. Oorweeg studierigtings wat verskillende belangstellings kombineer – soos besigheid (taal + logika), ingenieurswese (analities + kreatief), of maatskaplike werk (mensgerig + gestruktureerd).

ʼn Breë aanleg dui ook daarop dat jou kind waarskynlik meer as een beroep in hul leeftyd gaan hê. Fokus dus eerder op die ontwikkeling van oordraagbare vaardighede, soos kommunikasie, probleemoplossing en leerbaarheid. ʼn Beroep is dalk nie meer noodwendig ʼn lewenslange loopbaanpad nie – maar lewenslange aanpasbaarheid is goud werd.

Laat hulle toets en probeer

Vakansiewerk, skaduwerk, vrywillige projekte en loopbaanwerkwinkels is praktiese maniere om te toets wat werk – en wat nie. Moedig jou kind aan om verskillende rolle te verken. Selfkennis groei deur ervaring, nie net deur assessering nie.

Jy hoef nie nou al alles te weet nie

Om “enigiets” te kan doen, beteken nie jou kind moet dadelik kies nie. Soms is die regte keuse om met iets te begin wat hulle interesseer en dit mettertyd te verfyn. ʼn Breë aanleg is nie ʼn probleem nie – dis ʼn geskenk. Maar soos met enige geskenk, moet dit uitgepak word om sy volle waarde te ontdek.

By Solidariteit glo ons daarin om jong mense en hul ouers met die regte inligting en ondersteuning toe te rus om ingeligte besluite te neem. Solidariteit se Skoliere-aanbod help jou kind om nie net te verstaan wat hulle kan doen nie – maar om met selfvertroue te kies wat hulle wíl doen.

Sluit vandag by Solidariteit aan en gee jou kind die voorsprong van deeglike selfkennis en doelgerigte voorbereiding. Want die toekoms behoort aan dié wat weet waarheen hulle op pad is – en wat die regte gids het om daar uit te kom.