Ford-afleggings moontlik die begin van groter gevaar vir motorbedryf

Solidariteit bevestig dat Ford Suid-Afrika ’n amptelike kennisgewing aan die vakbond en ander gestuur het waarin die maatskappy sy voorneme aankondig om meer as 470 werknemers af te lê. Hierdie afleggings raak beide die Silverton-voertuigfabriek in Pretoria en die Struandale-enjinfabriek in Gqeberha.

Volgens die kennisgewing sê Ford die werksverliese volg op ’n “herbelyning” van sy produksievermoë wat met die huidige en verwagte markvraag moet ooreenstem. In werklikheid beteken dit die beëindiging van 391 operateursposte in Silverton, 73 by Struandale en 10 administratiewe poste. Solidariteit wil tydens die konsultasieproses vasstel wat presies die drastiese vermindering in Ford se voertuigverkope veroorsaak, want dit gee op sy beurt aanleiding tot dié werksverliese.

“Ons sien hierdie aankondiging as die begin van moontlike groter werksverliese wat die hele motorbedryf in Suid-Afrika in die gesig staar,” sê Willie Venter, adjunkhoofsekretaris van Solidariteit.

Volgens Venter veroorsaak ekonomiese druk, internasionale politieke onsekerhede, en die regering se ongunstige beleid dat dié bedryf toenemend onmededingend word. “Wanneer ’n motorreus soos Ford sulke drastiese stappe neem, is dit ’n waarskuwing vir die hele sektor. Ons vrees dat nog afleggings in dié bedryf onvermydelik kan wees indien die omstandighede nie vinnig verbeter nie,” waarsku hy.

Solidariteit bevestig dat hulle die konsultasieproses onder leiding en toesig van die Kommissie vir Versoening, Bemiddeling en Arbitrasie (KVBA) sal bywoon en dat al sy lede wat geraak word, volle ondersteuning sal ontvang.

“Ons sal elke moontlike alternatief ondersoek om werksverliese te beperk, en ons gaan seker maak dat Ford nie net sy plig nakom nie, maar dat werknemers regverdig behandel word,” sê Venter.

Solidariteit het ook daarop gewys dat hierdie afleggings ’n ernstige impak op die gemeenskappe in Pretoria en Gqeberha sal hê en dat dit weereens wys hoe kwesbaar die Suid-Afrikaanse nywerhede onder die huidige ekonomiese klimaat is.

“Sonder daadwerklike ingryping en ekonomiese hervorming van ons regering se kant af, gaan ons land nog meer werksverliese moet verduur,” sê Venter.