Die staat kan eenvoudig nie met komplekse NGV vertrou word nie

Die staat is nie in ʼn posisie om met gesondheidsorg van Suid-Afrikaners vertrou te word nie en moet daarom van enige gesentraliseerde gesondheidsversekeringskema weerhou word.

Dít is hoe Peirru Marx, netwerkkoördineerder van die mediese sektor by Solidariteit, vrae rondom die regering se bevoegdheid om beter gesondheidsorg vir Suid-Afrikaners te bied beantwoord.

Marx sê die regering probeer ten alle koste om die plan vir Nasionale Gesondheidsversekering (NGV) aan Suid-Afrikaners voor te hou as ʼn progressiewe oplossing waarvolgens rykes vir die mees kwesbares sal sorg.

“Selfs in hulle beantwoordende hofstukke oor die NGV hamer hulle op die gevolge van apartheid en neem geen verantwoordelikheid vir die feit dat die huidige openbare gesondheidsorgstelsel nie reg bestuur word nie.

“Ons kan egter nie toelaat dat die privaat gesondheidsorgstelsel vernietig word nie, en tog kan ons nie die staat vertrou om ʼn komplekse stelsel soos die NGV te implementeer nie, want alles waaraan die staat raak, flop,” sê Marx.

Solidariteit se hofsaak teen die NGV word deur die regering se hofstukke as voortydig en proteksionisties beskryf. Die regering het pas eers beantwoordende hofstukke ingedien.

Daarteenoor sê Solidariteit ʼn NGV-stelsel bly ʼn pypdroom solank geen kosteberekening daarvoor gedoen is nie. Solidariteit het egter sy eie NGV-alternatief bekendgestel waarin groter toegang tot gesondheidsorg vir meer Suid-Afrikaners moontlik kán wees.

Volgens hierdie alternatief behou die privaat stelsel egter sy plek in ons gesondheidslandskap.

“Ongelukkig lees ons nou in die media hoe 70% van mediese fasiliteite wat onder staatsbeheer val nie eers aan die minimum standaarde voldoen om gesondheidsdienste te kan lewer nie.

“Dit is weens werklikhede soos dié dat mense wat kán hul geld op privaat gesondheid bestee. Nou wil die regering voortgaan met verwoestende wetgewing sonder om die nodige fondasie in plek te stel en dit stel die belastingbetaler weereens bloot aan korrupsie en wanbestuur,” sê Marx.

Hy wys verder daarop hoe die kwesbares geen verbetering onder ʼn staatsbeheerde NGV kan verwag nie en dat die skema, soos alle ander staatsinstellings, onder ʼn onbetroubare regering ten gronde sal gaan.

“Die NGV gaan eenvoudig toegang gee tot belastinggeld met die versoek van die regering dat mense hulle hierdie keer moet vertrou en dat alles in orde sal wees. Dit terwyl hulle slegs na die verlede terugkyk en almal behalwe hulself vir die toestand van openbare mediese fasiliteite blameer,” sê hy.

Die Solidariteit Doktersnetwerk merk ook op dat mediese praktisyns nie van plan is om hul dienste as dienaars van die NGV aan te bied nie. Dit sluit dokters en ander gesondheidspraktisyns in wat tans in die openbare sektor werk, asook privaat praktisyns.

“Ons sien dit in ons netwerke. Ons is nie bewus van iemand wat positief oor die NGV-stelsel is nie. Talle ander wat onder ʼn soortgelyke stelsel oorsee gewerk het, kan ook getuig dat dit nie werk nie en geweldige lang wagtye ʼn gegewe is.

“Almal, insluitend Solidariteit, wil beter gesondheidsorg vir alle Suid-Afrikaners sien. Hierdie stelsel onder hierdie regering is egter nié die antwoord nie en daar moet alles moontlik gedoen word om Suid-Afrika van die NGV-ramp te red.”