Die groeiende noodsaaklikheid van digitale geletterdheid in die moderne werkplek

Deur Karen Waldeck

Die werkplek het ʼn revolusie ondergaan as gevolg van die versnelde integrasie van tegnologie in byna elke aspek van ons professionele lewens. Hierdie verskuiwings vereis ʼn nuwe vlak van vaardigheid en begrip wat bekend staan as digitale geletterdheid. Digitale geletterdheid, die vermoë om effektief te werk met tegnologie en digitale inligting, is ʼn onontbeerlike vaardigheid vir werknemers in die moderne era. Netwerk24 berig dat 72% van organisasies dit as ʼn prioriteit beskou om digitaal geletterd te wees en by te hou met die nuwe hulpmiddels wat beskikbaar word.

Die veranderinge wat plaasvind in die moderne werkplek

Met die toenemende ontwikkeling in tegnologie vandag laat dit elke werker met die vrees dat hulle binnekort deur tegnologie vervang sal word. Die moderne werkplek is nie meer beperk tot tradisionele kantooromgewings nie. Na die Covid-19-pandemie het al hoe meer maatskappye daarby gehou om hulle werknemers van die huis af te laat werk. Dit bespaar kostes vir die onderneming en is ook meer gerieflik vir werkers. Met die opkoms van tegnologiese vordering soos wolkgebaseerde stelsels, en digitale kommunikasie platforms, is werknemers nou in staat om van enige plek ter wêreld te werk. Hierdie nuwe realiteit vereis ‘n sterk greep op digitale hulpmiddels en toepassings om produktief te bly en effektief te kommunikeer.

Die rol van digitale geletterdheid

Om digitaal geletterd te wees beteken nie noodwendig jy weet hoe om ʼn e-pos te stuur nie. Daar is baie meer wat daaraan gekoppel word. Dit behels die vermoë om krities te dink oor en te navigeer deur die vloedgolf van inligting wat op die internet beskikbaar is, om digitale gereedskap vir doeltreffende kommunikasie en samewerking te gebruik, en om tegnologiese probleme op te los wanneer hulle ontstaan. Hierdie vaardighede is noodsaaklik vir die suksesvolle uitvoering van take in enige beroep, of dit nou ʼn kantooromgewing, ʼn veldwerk-omgewing, of ʼn virtuele span is.

Die voordele van sterk digitale geletterdheid

Verbeterde produktiwiteit: Werknemers wat vaardig is in digitale tegnologieë is in staat om hul take vinniger en meer doeltreffend af te handel.

Meer kliëntediens: Omdat meeste mense vandag verkies om eerder alles aanlyn te doen kan dit daartoe lei dat maatskappye ʼn groter kliëntebasis opbou.

Groter innovasie: Digitale geletterdheid moedig kreatiewe probleemoplossing aan en stel werknemers in staat om nuwe maniere te vind om hul werk te doen.

Effektiewe kommunikasie: ʼn Sterk begrip van digitale platforms en kommunikasiestelsels bevorder helder, doeltreffende kommunikasie binne en tussen spanne.

Verbeterde veiligheid: Bewustheid van digitale veiligheidskwessies en -praktyke help om organisasies te beskerm teen potensiële bedreigings soos slypaanvalle en data-kaping. Ondernemings word aangeraai om ʼn spesialis te kry om seker te maak dat alle kliënte se inligting veilig is.

In ʼn wêreld wat voortdurend aan die verander is as gevolg van tegnologiese vooruitgang, sal die noodsaaklikheid van digitale geletterdheid slegs toeneem. Diegene wat vaardig is in die gebruik van tegnologie sal ʼn voordeel hê in die mededingende arbeidsmark van die toekoms en sal beter toegerus wees om suksesvolle loopbane te bou. Met die groot verskeidenheid van tegnologie wat daarbuite is, is dit moontlik vir groot en klein ondernemings om op dreef te bly met tegnologie. Dit word aangeraai dat ondernemings hul werkers die geleentheid gee om digitale opleiding te kry.

Jy kan sulke vaardighede ontwikkel danksy Solidariteit se wye verskeidenheid kursusse vir voortgesette leer. Die wens is nie dat werk makliker is nie, maar dat ons beter word. Ontwikkel jou vaardighede en groei in jou loopbaan met Solidariteit se voortgesette leer-aanbod.