Die sielkunde agter verkope: In gesprek met Fergus Ferguson

“Elke besluit is op emosie gebaseer en begin in die onderbewussyn.” Dít is die mening van suksesvolle sake-afrigter Fergus Ferguson. Solidariteit het by hom gaan inloer en onder gesels oor die sielkunde agter verkope. Lees meer oor hoe jy jou verkoopsvernuf tot ʼn nuwe vlak kan neem.

Deur Kyla-Ann du Toit

Solidariteit se #VlymskerpVerkope-webinaarreeks het in Maart 2025 begin. Fergus Ferguson, ʼn ervare sake-afrigter en strategiekenner met dekades se ondervinding in finansies, bemarking en sakeontwikkeling, was die spreker op hierdie webinaar, en ons het by hom gaan inloer om meer uit te vind oor hoe emosies en gedrag kliënte kan beïnvloed.

Hier is Ferguson se antwoorde op ons vrae:

1. Wat is die mees fundamentele beginsels van suksesvolle verkope?

Mense koop by mense van wie hulle weet en hou en wat hulle vertrou. Dit is ʼn proses van vertroue wat op verskillende maniere en teen verskillende tempo’s gevestig moet word.

2. Hoe beïnvloed die sielkunde van menslike gedrag ʼn kliënt se aankoopbesluit?

Elke besluit is op emosie gebaseer en begin in die onderbewussyn.

3. Hoe kan ʼn verkoopspersoon vertroue met ʼn potensiële kliënt bou?

Dit hang van die persoon se persoonlikheidsoort af. Die verkoopspersoon moet die vermoë ontwikkel om die persoonlikheidsoort van die potensiële kliënt binne ʼn kort tydjie te kan bepaal. Navorsing oor die geleentheid, besluitnemer, sy politieke siening, persoonlike en amptelike agenda en sy rede vir besluitneming is kardinaal.

4. Watter strategieë help om kliënte se behoeftes beter te verstaan en daarby aan te pas?

“Everybody wants to buy, but nobody wants to be sold to.” Dit is belangrik om te verstaan watter probleem die potensiële kliënt het, waarom hy ʼn besluit moet neem en hoe dringend dit is.

5. Hoe kan ʼn verkoopspersoon weiering hanteer sonder om motivering te verloor?

As ʼn verkoopspersoon op probleemoplossing gefokus is, moet ʼn afwysing nie persoonlik opgeneem word nie. Daar bestaan verskeie strategieë om die sukseskoers van verkope te verbeter.

6. Wat is die belangrikste wenke vir doeltreffende onderhandeling?

Die vertrekpunt is altyd om ʼn wen-wen-situasie te bereik. Dit is ook belangrik om jou “BATNA” vooraf te bepaal. BATNA staan vir Best Alternative to a Negotiated Agreement.

7. Hoe het tegnologie en digitalisering die wêreld van verkope verander?

ʼn CRM (customer relationship management)-stelsel word dikwels as onontbeerlik beskou om jou mark te segmenteer en fokusaanbieding te formuleer. Kunsmatige intelligensie speel ook ʼn belangrike rol deur ideale leidrade te identifiseer, vergelykings met ander verskaffers te tref en aanbevelings vir ʼn mededingende voordeel te bied.

8. Watter sielkundige belemmerings verhoed mense soms om ʼn aankoop te maak, en hoe kan dit oorkom word?

Vorige slegte ervarings en reputasie speel ʼn groot rol. Sosiale media en ander platforms moet gebruik word om vertroue te bou en vorige suksesverhale te deel.

9. Watter rol speel liggaamstaal en stemtoon in ʼn suksesvolle verkoopsgesprek?

Liggaamstaal en stemtoon is van die belangrikste aspekte om vertroue te vestig.

10. Wat is jou belangrikste raad vir enige verkoopspersoon wat sy vaardighede wil slyp?

Verkope is ʼn lewensvaardigheid wat jy regdeur jou beroepslewe benodig. Wees sensitief en bewus daarvan, en fokus daarop om dit voortdurend te verbeter.

Volgens Ferguson bied Solidariteit se #VlymskerpVerkope-webinare waardevolle wenke waarsonder jy ‘n duur prys sou betaal. Dié kennis kan jou baie jare in die verkoopswoestyn spaar.. Boonop is die bywoning van hierdie webinare heeltemal gratis!

Dit is duidelik dat om in hierdie veld suksesvol te wees, ʼn mens nie net tegniese vaardighede benodig nie, maar ook ʼn diep begrip van menslike gedrag en emosies.

Moenie die volgende #VlymskerpVerkope-webinaar misloop nie! Hierdie soort insigte is vir enigeen in die kommunikasie- of bemarkingsveld van onskatbare waarde en kan ʼn beduidende verskil in jou loopbaan maak. Hou die Solidariteit Kommunikasie- en Bemarkingsnetwerk-groep dop vir meer inligting oor die volgende webinaar.