Die krag van ʼn gemeenskap: Vicky se storie

ʼn Jong vrou se roeping om ʼn versorger te word en haar pad na ʼn betekenisvolle loopbaan kry vlerke danksy die hulp van ʼn ondersteunende gemeenskap en Solidariteit se opleidingsinstellings. Vicky Smith se verhaal wys hoe mentorskap en die regte begeleiding iemand se toekoms kan rig, selfs ná ʼn moeilike begin. Hierdie inspirerende reis beklemtoon die krag van gemeenskap en die impak van georganiseerde ondersteuning op ʼn jong mens se lewe. Lees hier hoe Vicky haar roeping ontdek het en die geleentheid gekry het om ander te dien.

Deur Mari Ferreira

Daar word gereeld gesê: “It takes a village to raise a child.” In 2024 het ek eerstehands gesien hoe waar hierdie woorde is toe ek vir Vicky Smith ontmoet het. Vicky se lewenspad was nie maklik nie – sy het in verskeie pleegsorg- en kinderhuise grootgeword, totdat sy uiteindelik by twee engele beland het. Hierdie engele het in Desember 2024 na Solidariteit uitgereik vir hulp, raad en mentorskap vir Vicky, en só het ons paaie gekruis.

Ek het sonder huiwering Krugersdorp toe gery om haar en haar engele te ontmoet, en dit was duidelik dat Vicky ʼn besonderse jong vrou is. Sy is ʼn persoon met ʼn groot hart en ʼn diep begeerte om ʼn verskil in ander se lewens te maak. Haar passie vir bejaardes en haar roeping om te dien was duidelik, maar sy het net die regte rigtingwyser nodig gehad om haar drome te verwesenlik.

Ons het saam deur die belangstellingsbepaler gewerk – ʼn instrument wat haar gehelp het om duidelikheid oor haar beroepsrigting te kry. Die resultate het net bevestig wat ons reeds geweet het: Vicky is ʼn gebore versorger. Met haar natuurlike deernis en liefde vir mense was die keuse voor die hand liggend – sy wou ʼn tuisversorger word. Dit het haar op die pad na die Helpende Hand Opleidingsinstituut geplaas, waar sy sal leer en groei in ʼn beroep waarvoor sy ʼn diep passie het.

Met groot opgewondenheid het sy ingeskryf en toelating ontvang. Maar die gemeenskap se ondersteuning het nie daar geëindig nie. ʼn Pragtige woonplek, net ʼn klipgooi vanaf haar studietuiste, is vir haar gevind. Verskeie mense het hande gevat om haar nuwe tuiste in te rig en seker te maak dat sy alles het wat sy nodig het om voluit op haar studies en loopbaan te kan fokus.

Hierdie hele ervaring het my weereens laat besef hoe kragtig ʼn gemeenskap en ʼn ondersteuningsnetwerk kan wees. Dit is belangrik om vir hulp te vra en om mentorskap te aanvaar. Solidariteit se beroepsnetwerke is ʼn plek waar mense kan tuis voel, leiding kan ontvang en die nodige ondersteuning kan kry om hul drome te verwesenlik. Dit is ʼn plek waar mense met ʼn wil om te werk die geleenthede kry om dit te doen.

Ons pad met Vicky is nog lank nie verby nie. Sy is ʼn inspirasie vir ons almal, en ons sien met opgewondenheid uit na die hoë hoogtes wat sy nog gaan bereik. Sy is die perfekte voorbeeld van hoe ʼn gemeenskap, deur samewerking en ondersteuning, iemand se lewe kan verander. Die Solidariteit Beweging se opleidingsinstellings se deure staan oop vir mense soos Vicky – mense met ʼn roeping en ʼn begeerte om ʼn verskil te maak.

Solidariteit glo dat kennis die beste manier is om ons gemeenskap te beskerm. #JyHoortHier en daarom bou Solidariteit kennisinstellings om die volgende generasie te bemagtig en ʼn vry, veilige en voorspoedige toekoms te verseker.

Jý kan ook ʼn verskil in ander se lewens maak – raak vandag nog betrokke.