Wanneer eensaamheid ʼn digitale vorm aanneem: ʼn Onderhoud met dr. Serahni Symington

Al is kinders en tieners aanlyn verbind, ervaar baie steeds digitale eensaamheid. In hierdie artikel deel dr. Serahni Symington insigte oor die impak op geestesgesondheid, waarskuwingstekens, en hoe gesinne gesonde digitale gewoontes kan ontwikkel. Die artikel bied praktiese wenke en strategieë vir hoe jy as maatskaplike werker kan help om kinders se verbondenheid in die regte wêreld te versterk. Lees hier meer oor hoe jy ʼn verskil kan maak.

Deur Kyla-Ann du Toit

In die digitale era waarin ons onsself bevind, lyk dit soms asof ons meer verbind is as ooit tevore. Tog ervaar baie kinders en tieners ʼn diepgaande gevoel van eensaamheid. In hierdie artikel gesels ons met dr. Serahni Symington, ʼn spelterapeut en ouerskapkenner, om die realiteite van digitale eensaamheid en die impak daarvan op kinders se geestesgesondheid te ondersoek, en hoe maatskaplike werkers kan help.

1. Hoe beïnvloed digitale isolasie kinders en tieners se geestesgesondheid en watter patrone sien jy in die praktyk?

Digitale isolasie kan in uiterste gevalle tot angs, depressie en ʼn lae selfbeeld lei, veral omdat kinders en tieners dikwels hul selfwaarde aan hul aanvaarding aanlyn koppel. Ek sien in my praktyk dat baie jong mense met sosiale vaardighede sukkel, veral die hantering van konflik, omdat hulle beperkte werklike interaksie het. Tydens die tienerjare probeer hulle hul identiteit vestig, en wanneer hulle nie deur hul portuurgroep aanvaar word nie, ervaar hulle dikwels eensaamheid – selfs al spandeer hulle ure aanlyn.

2. Watter rol speel sosiale media in die skep van ʼn valse gevoel van verbondenheid, en hoe kan maatskaplike werkers hierdie kwessie aanpak?

Sosiale media bied die illusie van aanvaarding, maar baie van hierdie verhoudings is oppervlakkig en nie emosioneel vervullend nie. Soms is hierdie verhoudings ook vals omdat mense nie die volle waarheid oor hulself deel nie. Maatskaplike werkers kan jong mense help om gesonde verhoudings te bou deur hulle aan te moedig om krities na aanlyn interaksies te kyk en deur hulle te ondersteun in die bou van betekenisvolle aanlyn verhoudings. Dit begin by die ontwikkeling van selfwaarde: “Wie wil jy wees en wat is jou waardes?”

3. Wat is die waarskuwingstekens van ʼn kind of tiener wat digitale eensaamheid ervaar?

Daar is verskeie tekens om op te let: ʼn Kind kan sosiale geleenthede begin vermy wat hulle voorheen geniet het, of daar kan ook ʼn verhoogde emosionele wanbalans en ʼn wisselvallige gemoedstoestand wees, wat buite die norm van die kind of tiener se gedrag val. ʼn Kind kan obsessief aanlyn wees sonder werklike verbintenis, wat dui op ʼn gebrek aan gesonde interaksie.

Verder kan akademiese prestasie afneem en belangstelling in stokperdjies of sport verminder. Tekens van angs of depressie, wat nie deur ander stresfaktore verduidelik kan word nie, is ook duidelike tekens. Gedrag wat skelm of geheimsinnig is, soos die gebruik van kodes op fone en rekenaars, dui ook op ʼn probleem.

4. Hoe kan ouers en maatskaplike werkers kinders help om ʼn gesonde balans tussen aanlyn interaksies en werklike sosiale verhoudings te handhaaf?

Ouers moet duidelike grense vir skermtyd stel en gesinsaktiwiteite aanmoedig. Skep ʼn omgewing waar daar skermvrye tye is en moedig fisieke aktiwiteite aan. Dit help kinders om ʼn balans tussen die digitale wêreld en werklike interaksies te vind. ʼn Belangrike aspek is om hulle ook te leer hoe om gesonde digitale grense te stel, soos om tydens sekere ure van die dag nie aanlyn te wees nie. Deur met kinders oor die impak van digitale afhanklikheid te praat, kan hulle die nodige bewustheid ontwikkel.

5. Is daar spesifieke risikofaktore wat sekere kinders meer vatbaar maak vir digitale eensaamheid?

Ja. Kinders wat reeds met selfbeeld, sosiale angs of akademiese druk sukkel, is dikwels meer geneig om hulself in ʼn digitale wêreld te isoleer. Kinders wat in gesinne met swak emosionele ondersteuning of kommunikasie grootword, is ook geneig om meer vatbaar vir digitale eensaamheid te wees.

6. Hoe hou digitale eensaamheid verband met ander geestesgesondheidskwessies, soos depressie, angs en selfs selfmoordneigings?

Digitale eensaamheid versterk gevoelens van isolasie en ontoereikendheid, wat tot depressie en angs kan lei. Jong mense wat reeds kwesbaar is, kan sosiale media as ʼn hanteringsmeganisme gebruik, wat die risiko vir selfmoordgedagtes verhoog indien daar nie voldoende ondersteuning is nie.

7. Wat is doeltreffende strategieë of ingrypings wat gesinne kan gebruik om gesonde digitale gewoontes te ontwikkel?

Stel digitale gesinsreëls op, soos geen fone tydens etes nie, en moedig tegnologievrye tye aan. Ouers moet ʼn voorbeeld stel deur self gesonde skermgebruik te toon en geselskap oor digitale ervarings aan te moedig.

8. Hoe kan maatskaplike werkers ouers bemagtig om hul kinders se digitale wêreld beter te verstaan en te bestuur?

Maatskaplike werkers kan ouers oplei oor digitale geletterdheid, die gevare van oormatige skermtyd en hoe om hul kinders se aanlyn interaksies op ʼn positiewe manier te monitor sonder om hul privaatheid in te boet.

9. Is daar spesifieke digitale platforms of tegnologieë wat jy sou aanbeveel vir gesonde aanlyn interaksie, of wat eerder vermy moet word?

Platforms wat kreatiewe betrokkenheid en opvoedkundige groei bevorder, soos Duolingo of Scratch, is voordelig. Ander platforms wat op uiterlike validering (goedkeuring of bevestiging) fokus, soos Instagram en TikTok, kan problematies wees vir kinders wat met selfbeeldkwessies sukkel.

10. Watter raad het jy vir maatskaplike werkers om op hoogte te bly van kinders se digitale wêreld?

Neem deel aan opleiding oor digitale geletterdheid omdat die platforms en gebruike so gereeld verander. Volg betroubare bronne oor kinders en tegnologie – ervare navorsers en gegronde teorie. Wees aktief in ouergemeenskappe waar digitale uitdagings bespreek word. Bou oop verhoudings met kinders en tieners om hul digitale ervarings beter te verstaan, en vra vir tieners self waaroor hulle bekommerd is – hulle is soms geweldig wys en kan ons help om die wêreld beter te verstaan.

Die digitale era bied baie voordele, maar dit bring ook unieke uitdagings mee vir kinders en tieners wat met eensaamheid en geestesgesondheid sukkel. Maatskaplike werkers speel ʼn belangrike rol in die ondersteuning van gesinne om gesonde digitale gewoontes te ontwikkel en jong mense te help om werklike, vervullende verhoudings te bou – aanlyn sowel as in die regte wêreld.  

Die Solidariteit Maatskaplikewerkersnetwerk glo dat jy as maatskaplike werker werklik ʼn onmisbare rol in talle mense se lewens speel. Daarom bied ons ʼn veilige hawe vir maatskaplike werkers waar hulle die nodige ondersteuning en geleenthede vir ontwikkeling kan vind om hul roeping met selfvertroue uit te leef.

Sluit by Solidariteit aan en word deel van jóú beroepstuiste wat jou beskerm, ondersteun en inlig.