Hoe loopbaanvoorligters jou kind met beroepskeuses kan help

Deur Ané Janse van Rensburg

Ingeligte besluite is die sleutel tot jou kind se sukses in hulle toekomstige beroepskeuses. Jou kind moet hom- of haarself goed ken, en kan onderskei tussen hul aanlegte en belangstellings om vir hulself ʼn goeie toekoms op te droom.

Solidariteit maak loopbaanvoorligtingshulpbronne aan jou kind beskikbaar om hulle te help met hulle beroepskeuses. Die eerste van hierdie hulpbronne is die belangstellingsbepaler. Hierdie hulpbron is ʼn vinnige aanlyn toets wat jou kind kan voltooi om te bepaal waarvan hy of sy hou.

Na aflegging van Solidariteit se belangstellingsbepaler, is die volgende stap om psigometriese toetse by een van ons voorgestelde loopbaanvoorligters af te lê. Solidariteit se netwerk van loopbaanvoorligters bestaan uit kundige sielkundiges en psigometriste wat almal by die Raad vir Gesondheidsberoepe van Suid-Afrika (HPCSA) geregistreer is.

“ʼn Loopbaanvoorligter kan jou kind oor beroepsbesluite adviseer nadat hy of sy ʼn persoonlikheids- en aanlegtoets voltooi het. Solidariteit se loopbaanvoorligters sal ook ʼn verslag saamstel en ʼn persoonlike terugvoersessie aanbied om die uitslae aan die kind en ouer te verduidelik,” sê Mareli Bothma, bestuurder van Solidariteit se skoliere-aanbod.

Wat behels die psigometriese toetse wat loopbaanvoorligters aflê?

ʼn Psigometriese toets is ’n persoonlikheids- en aanlegtoets wat jou kind se aanlegte, vaardighede en karaktereienskappe na vore bring, en dit word slegs onder streng toesig deur gekwalifiseerde kundiges gedoen.

Jy as ouer kan een van Solidariteit se voorgestelde loopbaanvoorligters kontak vir ʼn belangstellingsbepaler-pakket. Hierdie pakket is aan Solidariteit-lede te koop, en sluit die volgende in:

• • ten minste een geakkrediteerde psigometriese toets wat jou kind se aanleg bepaal;
• • ten minste een geakkrediteerde psigometriese toets wat jou kind se persoonlikheid analiseer; en
• • ten minste een konsultasie wat ’n uur lank duur met die kundige van jou en jou kind se keuse.

Ontdek Solidariteit se skoliere-aanbod en kry toegang tot ʼn reeks voorgestelde loopbaanvoorligters. Solidariteit se netwerke wil saam met jou en jou kind aan ʼn voorspoedige toekoms bou.