#JongYsters toon hul staal in Ambagresies op Ambagdag 2025

Die #JongYster-ambagresies het Sol-Tech se topstudente uitgedaag om hul tegniese vaardighede, deursettingsvermoë en kreatiwiteit tydens Ambagdag 2025 te toon. Dié intense kompetisie skei die beste van die res, en die wenner word op 7 April 2025 aangekondig. Lees hier meer oor vanjaar se Ambagresies.

Deur Kyla-Ann du Toit

Yster slyp yster by vanjaar se #JongYster-ambagresies, aangebied deur Solidariteit se Studente-aanbod.

Die opwindende #JongYster-ambagresies het op 15 Maart by Ambagdag plaasgevind waartydens Sol-Tech se top-ambagstudente hul staal getoon het. Die Ambagresies is die toets van ware vakmanskap! Elke yster word in die vuur getoets en só word elke ambagsman of -vrou se vaardighede geslyp met harde werk en toewyding.

Hierdie intense uitdaging is ʼn belangrike deel van Solidariteit se #JongYster-kompetisie waar kandidate se tegniese vaardighede, deursettingsvermoë en probleemoplossingsvaardighede op die proef gestel word.

ʼn Kompetisie van yster en vasberadenheid

Die #JongYster-toekenning gee erkenning aan Sol-Tech-uitblinkers – studente wat met passie, vernuf en deursettingsvermoë ʼn reusesukses van hulle ambag maak!

“Die Ambagresies is die deel van die #JongYster-kompetisie waartydens die koring van die kaf geskei word. Nie net word deelnemers se handvaardighede getoets nie, maar ook hul kritiese denke, uithouvermoë en kreatiwiteit. Soos hulle sê, yster slyp yster, en hierdie #JongYsters slyp mekaar vir seker,” sê Chereé Meyer, organiseerder van Solidariteit se Studente-aanbod.

 ʼn Slagveld van vernuf

Tydens die Ambagresies moes kandidate uitdagende praktiese opdragte voltooi wat hul tegniese kennis, akkuraatheid en spoed tot die uiterste beproef het. Die beoordelaars het nie net op die eindresultaat gefokus nie, maar ook op hoe die deelnemers probleme hanteer, hul vaardighede toepas en in ʼn spanopset presteer.

“Die #JongYster-ambagresies was baie lekker, maar tog baie uitdagend,” sê Dylan Venter, ondervoorsitter van Sol-Tech se studenteraad en Ambagresies-deelnemer. Ek het baie nuwe dinge geleer en sien vreeslik uit na die aankondiging van die finaliste vir die #JongYster-kompetisie.”

Wat lê voor?

Die kandidate wat suksesvol was in die Ambagresies, dring nou deur na die volgende ronde van die kompetisie: onderhoude op 1 April 2025. Tydens die onderhoude sal hul ingesteldheid, motivering en leierskap verder geëvalueer word. Op 7 April 2025 word die topdrie-finaliste aangekondig, waarna die uiteindelike wenner amptelik aangekondig en vereer sal word.

Die toekoms van ambagslui is blink

“Die #JongYster-kompetisie gee Sol-Tech-studente die geleentheid om hul eie vaardighede te slyp, om in spangees deel te neem en ook om vir baie lekker pryse mee te ding,” sê Meyer. “Solidariteit se Studente-aanbod het ten doel om studente te bemagtig om gereed te wees vir die werkplek, maar ook om studente te ondersteun om die kampus as volronde mense te verlaat en die wêreld van werk te betree. In samewerking met Sol-Tech is dít presies wat die #JongYster-kompetisie wil bereik.”

Die #JongYster-kompetisie is ʼn bewys van die talent en toewyding wat Solidariteit se Studente-aanbod en die Solidariteit Ambagnetwerk koester. Hierdie jong manne en vroue bou nie net aan hul eie toekoms nie, maar ook aan ʼn sterker, meer bekwame arbeidsmag. Solidariteit is trots op elke deelnemer wat sy of haar staal getoon het!

Hou Solidariteit se sosialemediaplatforms dop om die volgende opwindende ronde in die kompetisie te volg en te sien wie die nuwe #JongYster vir 2025 is.

Skep vandag nog jou gratis profiel op Solidariteit en sluit by die Studentelewe-groep aan – jóú aanlyn tuiste!