Keer só rugpyn in die werkplek

Rugpyn is ʼn epidemie onder kantoorwerkers wat lang ure agter ʼn lessenaar deurbring, en dit lei onder meer tot ʼn toename in personeelafwesigheid en verlore produktiwiteit. Lees in hierdie artikel hoe jy rugpyn in die werkplek kan keer.

Deur Nico Strydom

Navorsing dui daarop dat meer as een uit elke vier werkende volwassenes lae rugpyn ervaar, en dat dit ʼn toenemende werkverwante gesondheidsprobleem is wat mense van alle ouderdomsgroepe raak. Dit is veral kantoorwerkers wat die hele dag agter ʼn lessenaar sit wat rugpyn ervaar weens ʼn krom postuur, spanning en ooreising van die rugspiere.

Werkgewers het ʼn regsverpligting om ʼn veilige werksomgewing vir werknemers te verseker. Kantoormeubels soos aanpasbare lessenaars en stoele wat ʼn goeie postuur ondersteun, word onder meer ingespan in ʼn poging om rugprobleme te voorkom. Werkgewers kan werknemers verder ook toerus deur inligting en opleiding aan hulle te bied oor maniere om te werk ten einde ʼn goeie postuur te handhaaf.

Werknemers kan ook self, in samewerking met die werkgewer, verskeie stappe doen om rugpyn te probeer verhoed en te bestuur. Dit behels onder meer om ʼn ergonomiese werkspasie in te rig deur jou stoel, sleutelbord en monitor tot op die regte hoogte te verstel wat ʼn goeie postuur aanmoedig.

ʼn Goeie stoel sal ondersteuning vir jou lae rug bied en jy kan dit ook oorweeg om ʼn kussing aan te skaf om jou lae rug verder te ondersteun. Dit is belangrik om deurlopend op jou postuur te let en jou rug reguit te probeer hou deur terug te sit in jou stoel, jou elmboë naby jou lyf te hou en jou skouers te ontspan. Jou voete moet plat op die grond wees. Gebruik ʼn voetrus indien jou voete nie aan die grond raak nie.

Deur jou skerm op die regte hoogte te posisioneer kan keer dat daar bykomende spanning op jou nek en rug is. Indien jou skerm ooghoogte is, sal dit onnodige spanning in jou nek, skouers en rug vermy. Gebruik staanders om jou skerm te lig en pas jou stoel se hoogte aan om te verseker jou skerm is op ooghoogte.

Dit is verder belangrik om gereeld op te staan en dan óf ʼn kort entjie te loop óf strekoefeninge te doen om spanning in jou rug, nek en skouers te verlig. Gereelde fisieke oefening buite werksure sal ook help om jou rugspiere te versterk en jou algehele postuur te verbeter.

Deur hierdie strategieë en wenke in jou daaglikse roetine in te sluit, kan jy die risiko van rugpyn en ongemak aansienlik verminder indien jy daagliks by ʼn lessenaar moet sit en werk. Hierdie klein aanpassings kan tot aansienlike verbeterings in jou algehele ruggesondheid en gerief lei.

Solidariteit is jou vennoot in die werkplek en stap die pad saam met jou om te groei en ontwikkel sodat jy jou volle potensiaal in die werkplek kan bereik. Skep vandag nog jou gratis profiel op Solidariteit en sluit aan by ʼn gemeenskap van werk waar jy kan leer en floreer!