Persoonlike trauma in die werkplek

Meeste mense sal in hulle lewe aan minstens een traumatiese gebeurtenis blootgestel word en die moontlike nagevolge daarvan kan dikwels ook oorspoel in die werkplek. Lees verder hoe werkgewers hulle werknemers in moeilike tye kan bystaan

Deur Nico Strydom

Dit is nie altyd maklik om jou persoonlike lewe van jou werklewe te skei nie en trauma kan groot veranderinge in ’n persoon se lewe te weeg bring wat onder meer tot ontwrigting in hul persoonlike lewe en werklewe kan lei.

Die Amerikaanse Psigologiese Vereniging beskryf trauma as ʼn emosionele reaksie op ʼn verskriklike gebeurtenis soos ʼn ongeluk, misdaad, ʼn natuurramp, mishandeling, verwaarlosing, of die afsterwe van ʼn geliefde. Moontlike langtermynreaksies op trauma sluit onder meer herhalende terugflitse en nagmerries in, vermydingsimptome, angs en depressie.

In die werkplek kan trauma onder meer tot gevolg hê dat ʼn werknemer sukkel om te konsentreer of te fokus, sekere take en situasies vermy, sukkel om verhoudings met hulle kollegas te bou of uitbarstings hê.

Sekere snellers kan tot gevolg hê dat iemand trauma herleef. Hierdie snellers kan goed wees soos sekere aksies, woorde, reuke, geluide of situasies. Persoonlike trauma kan werkverrigting en loopbaangroei aansienlik beïnvloed. Individue kan self verskeie stappe doen om hul trauma in die werkplek te hanteer. Dit behels onder meer om sekere oefeninge en doen-dinge te hê soos meditasie of diep asemhalingstegnieke te beoefen. ʼn Ondersteuningsnetwerk kan ook baie waardevol wees en individue kan ook oorweeg om professionele hulp te kry. 

Werkgewers kan ook ʼn belangrike rol speel om werknemers te help om ʼn traumatiese gebeurtenis te verwerk en daarvan te herstel. Dit behels dat werkgewers bewus moet wees van die gevolge wat trauma op ʼn persoon kan hê, om sodoende ʼn veilige werksomgewing te bevorder.

ʼn Trauma-ingeligte werkplek behels onder meer om hulpbronne te verskaf vir geestesgesondheidsondersteuning, die bevordering van ʼn werk-lewe-balans, en die skep van ʼn kultuur van begrip en empatie.

Personeel speel ʼn kardinale rol in die sukses van jou organisasie. ʼn Welstandprogram skep nie net vertroue in die organisasie nie, maar dra ook by tot gesonde en positiewe personeel ongeag die grootte van jou organisasie.

Solidariteit bied vir werkgewers ʼn kursus aan om na hul werknemers se welstand om te sien. Die kursus bevat onder meer raad en wenke oor hoe om die impak van personeelwelstand te hanteer en te weet hoekom welstand in die werkplek belangrik is. Om dit te doen moet jy weet hoe om die stand van personeel se welstand te identifiseer deur vir sekere gevaartekens uit te kyk en daadwerklik op te tree indien daar kommer is. Jy moet ook jou rol as werkgewer verstaan wanneer dit kom by die bestuur van personeel se welstand én wat ʼn werknemer se eie verantwoordelikhede in hierdie verband is. 

Daar is ook praktiese wenke oor die uitrol van ʼn welstandprogram en hoe om stigmas rondom welstand in die werkplek af te breek. Dit sluit in om hulpbronne vir werknemers te verskaf om hul welstand te bestuur en ʼn kultuur te skep waar welstand as belangrik geag word.

Wees aan die voorpunt van jou loopbaanontwikkeling. Lees hier meer oor jou eenstop-beroepstuiste vir voortgesette leer. Indien jy nog nie ʼn lid van Solidariteit is nie, klik hier om binne ʼn minuut aan te sluit. Klik hier indien jy hierdie kursus wil voltooi, of lees hiermeer oor hoe jy vir dié kursus kan inskryf.