Terug kantoor toe is “goed vir jou psige”

Deur Nico Strydom

In ʼn tyd waar ontkoppeling, uitbranding en onbetrokkenheid toeneem, kan die werkplek ʼn bron van ondersteuning, struktuur en hernude doel wees.

Dr. Cecile Benade, bedryfsielkundige en organisatoriese effektiwiteitsleier by die Momentum-groep, sê dat die narratief rondom die terugkeer kantoor toe in die post-pandemie-periode grootliks op weerstand gefokus het, veral oor bekommernisse rondom buigsaamheid, ʼn gebalanseerde werk-lewe-benadering en produktiwiteit.

“Maar in hierdie gesprek gaan ʼn belangrike dimensie verlore: Die sielkundige waarde van gedeelde werkruimtes. Vanuit ʼn professionele oogpunt ontsluit fisieke teenwoordigheid in die kantoor sosiale en sielkundige hulpbronne wat afstandwerk moeilik kan naboots. Informele gesprekke, spontane samewerking en persoonlike terugvoer dra by tot sterker werkplekverhoudings en ʼn dieper gevoel van samesyn.”

Volgens Benade het selfs klein interaksies, soos om jou naweekplanne met iemand te deel, ʼn beduidende impak, aangesien dit werknemers help om gesien, gewaardeer en verbind te voel met iets groter as hulself.

“Hierdie gevoel van verbintenis het ʼn direkte invloed op ʼn individu se emosionele veerkragtigheid en geestelike welstand. Dit bou vertroue, verminder stres en verhoog moraal – alles noodsaaklike bestanddele vir ʼn florerende werkmag.

“Nog ʼn voordeel is die sielkundige struktuur wat ʼn formele werkomgewing bied. Om gereed te maak vir werk, na die kantoor te pendel, gedefinieerde werkure te hê en die huis van die werk te skei, help om geestelike grense te vestig. Hierdie roetine verminder die risiko van uitbranding en verbeter fokus, aangesien dit werknemers in staat te stel om rolle meer effektief deur die dag te wissel.”

Met meer as ʼn derde van Suid-Afrikaners wat op een of ander vlak afstandwerk benut, probeer baie organisasies die regte balans vind, sê Sandra Crous, besturende direkteur by Deel Local Payroll.

“Daar is ʼn verwagting vir meer werkplekbuigsaamheid, en daar is sommige rolle wat beter werk wanneer daar buigsame ure en liggings is. Aangesien ons digitale samelewing afstandwerk en buigsame werkure moontlik maak, kan jy sien hoekom dit ʼn norm geword het. Maatskappye moet dink oor waar dit gepas is en hoe hulle die stelsels skep om verskillende werkstyle te bestuur.”

Crous wys daarop dat werkplekbuigsaamheid ingewikkeld is, aangesien dit van verskeie faktore afhang, soos werknemerrolle, bestuurstyle en kliënteverwagtinge.

“Werkplekbuigsaamheid is onmoontlik in sommige poste of bedrywe. Dit kan loopbane stagneer of verhef. Dit kan betaling verminder of bonusse verhoog. Dit kan sommige werk meer produktief maak en ander minder. In sommige gevalle het dit glad nie ʼn impak nie. As maatskappye afstandwerk by hul vereistes wil aanpas, benodig hulle stelsels wat buigsaamheid ondersteun.”

Solidariteit is jou vennoot in die werkplek! Bly ingeskakel vir nog relevante inligting oor werk, produktiwiteit en jou regte in die werkplek. Skep jou gratis profiel vandag nog!