Solidariteit bekommerd oor groeiende salaris- en bestuurskrisis by Denel

Solidariteit spreek sy ernstige kommer uit ná berigte dat werknemers by Denel PMP tydens ʼn algemene personeelvergadering ingelig is dat die afdeling nie in staat is om salarisse vir die huidige maand uit te betaal nie.

Daar is intussen ook berig dat werknemers by Denel Dynamics op soortgelyke wyse ingelig is dat hul salarisse nie betaal sal word nie. Dit dui op ʼn groeiende krisis wat die hele groep raak, eerder as ʼn geïsoleerde probleem binne ʼn enkele afdeling.

Volgens Derek Mans, sektorkoördineerder by Solidariteit, is hierdie situasie uiters onaanvaarbaar en ontstellend, veral in die lig van die ingrypende intervensiemaatreëls wat minder as ʼn jaar gelede ingestel is om Denel se bedrywighede te stabiliseer.

“In 2024 het Denel PMP, in samewerking met Solidariteit en die Denel-raad, ʼn multidissiplinêre taakspan saamgestel – met aktiewe betrokkenheid van arbeid deur twee vakbonde – om Denel se uitvoerende bestuur en raad te adviseer oor ʼn volhoubare omkeerstrategie vir PMP,” sê Mans.

Die taakspan het volgens goedgekeurde verwysingsterme gefunksioneer wat onder meer bestuur, veiligheid, bedrywighede, befondsing en volhoubaarheid gedek het. Die omkeerproses is as ʼn projek bestuur om inwerkstelling te versnel.

Die taakspan het uit bedryfskenners, voormalige PMP-bestuurders en ervare voormalige parlementslede, insluitend mnr. Kobus Marais bestaan. Die strategiese dokument is in Desember 2024 voltooi en aan die Denel-raad voorgelê, met omvattende aanbevelings en kosteberekeninge.

Tydens ʼn formele raadsvergadering op 18 Februarie 2025 het die Denel-raad die implementering van die omkeerplan goedgekeur, met ʼn beraamde koste van ongeveer R120 miljoen.

Minder as ʼn jaar ná hierdie goedkeuring:

• het Denel PMP na bewering vier ontploffings ervaar, wat ernstige vrae laat ontstaan oor operasionele beheer, veiligheidsbestuur en instandhouding;
• word werknemers by Denel PMP sowel as Denel Dynamics meegedeel dat salarisse nie uitbetaal kan word nie; en
• is daar geen sigbare aanspreeklikheid vir die versuim om ʼn goedgekeurde en bekostigbare omkeerstrategie te implementeer nie.

 
“Dit bring ons by die onvermydelike vraag: waar is die gevolge vir hierdie volgehoue mislukking in uitvoering en toesig?” vra Mans.
 
Die toenemende salariskrisis, wat nou meer as een afdeling raak, beklemtoon ʼn sistemiese bestuur- en leierskapsmislukking op groepvlak. Hierdie situasie word vererger deur die voortgesette afwesigheid van ʼn permanente Denel-raad, ondanks verwagtinge dat die aanstellingsproses reeds teen Desember 2025 afgehandel sou wees.
 
“Solidariteit waarsku al vir ʼn geruime tyd dat Denel nie deur tussentydse leierskapstrukture, gefragmenteerde aanspreeklikheid en krisisgedrewe besluitneming gestabiliseer kan word nie,” sê Mans.
 
Wat nou dringend vereis word, is:

• die aanstelling van ʼn nuwe, permanente raad met toepaslike kundigheid in die verdedigingsbedryf, ingenieurswese, finansies en projekuitvoering;
• gevolgebestuur vir die nie-implementering van raadsgoedgekeurde strategieë;
• ʼn pragmatiese bestuursbenadering met geen verdraagsaamheid vir korrupsie nie; en
• die ernstige oorweging van openbare privaat vennootskappe om volhoubaarheid te herstel, strategiese vermoëns te beskerm en werkgeleenthede te beveilig.

“Werknemers kan nie aanhou om die prys te betaal vir bestuursverlamming en leierskapsvakuums nie. Denel se strategiese rol, en die voortbestaan van sy werknemers, vereis beslissende leierskap, aanspreeklikheid en onmiddellike ingryping,” beklemtoon Mans.

Solidariteit sal voortgaan om alle beskikbare roetes te volg om sy lede te beskerm en om dié wie verantwoordelik is, tot verantwoording te roep.