Student, hoe lyk  jou geldpersoonlikheid?

Jy is dalk reeds op pad na jou volgende groot avontuur ná universiteit, maar voordat jy jou toekomsdrome najaag, is daar een belangrike ding wat jy moet verstaan – hoe om jou geld te bestuur! Solidariteit se Studente-aanbod stel vanaf April 2025 ʼn splinternuwe video bekend wat jou gaan help om jou geldpersoonlikheid te ontdek en jou finansies slim te bestuur. Lees meer hier en kry toegang tot ʼn lekker vasvra oor jou geldpersoonlikheid.

Deur Kyla-Ann du Toit

Is jy onseker oor hoe om jou geld reg te bestuur? Wat nog te sê van hoe om jou uitgawes te balanseer of om jou spaardoelwitte te bereik? Moenie jou bekommer nie! Solidariteit se Studente-aanbod maak die bestuur van jou finansies sommer heelwat makliker. Danksy ons nuwe video wat oor ʼn mens se geldpersoonlikheid handel, kan jy jou finansiële pad met selfvertroue aandurf!

Wat kan jy van hierdie video verwag?

Solidariteit se gratis geldpersoonlikheid-video sal jou help om jou bestedingspatrone te verstaan. Danksy hierdie video sal jy uitvind wat jy benodig om slim geldbesluite te neem. Deur jou geldpersoonlikheid te ontdek, sal jy jou geldgewoontes beter kan ontleed – dit alles help jou om beter te begroot en vir die toekoms te beplan. Wanneer jy weet wat jou geldpersoonlikheid is, sal jy die nodige kennis hê om finansiële slaggate te vermy en jou geld doeltreffend te bestuur.

Die video sal jou ook leer hoe om ʼn begroting op te stel, jou uitgawes te balanseer en die regte spaar- en beleggingskeuses te maak, selfs as ʼn student. Deur die regte keuses te maak, sal jy jou finansiële vryheid bereik en die pad na ʼn gesonde finansiële toekoms begin.

Jou toekoms is in jou hande

“Met hierdie videoreeks gee ons studente die nodige insig om nie net hul geldpersoonlikheid te ontdek nie, maar ook om hulle te help om finansiële slaggate te vermy en slim besluite te neem,” sê Chereé Meyer, netwerkorganiseerder van Solidariteit se Studente-aanbod. “Deur jou finansies van die begin af reg te bestuur, sal jy ʼn sterker finansiële toekoms bou.”

Hierdie video dek die basiese beginsels van finansiële bestuur wat enige student moet bemeester om gereed te wees vir die wêreld ná universiteit. Danksy hierdie video sal jy die werkplek met selfvertroue kan aanpak en sommer van dag een af presies weet hoe om met jou geld te werk.

💡Wat is jou geldpersoonlikheid – is jy ʼn rasende rooi, gewilde geel, geruste groen of dalk ʼn besliste blou? Doen hierdie vinnige geldpersoonlikheid-vasvra en vind sommer dadelik uit. Gaan kyk die Geldpersoonlikheid-video’s op Solidariteit se Studentelewegroep om uit te vind wat jou kleur beteken!

Solidariteit maak die bestuur van jou finansies soveel makliker vir jou. Skep jou gratis profiel vir toegang tot die video op die Studentelewe-groep en begin vandag al slim geldbesluite neem.

Verseker ʼn suksesvolle toekoms vir jouself saam met Solidariteit!