Wat het van die groot raswette-ooreenkoms geword?

Onthou jy 2023 se groot stryd oor raswette en veral die Wysigingswet op Gelyke Indiensneming? ’n Skikkingsooreenkoms tussen Solidariteit en die regering is Onder toesig van die Internasionale Arbeidsorganisasie (IAO) is bereik wat ook as konsepregulasies in die Staatskoerant gepubliseer is.

Dit het grootliks die angel uit die wysigingswet geneem.

Die publiek het ná publikasie in Die Staatskoerant ʼn tydperk van 90 dae gehad om kommentaar daarop te lewer en die tydperk vir kommentaar het sedertdien verstryk.

Maar waar los dit nou hierdie saak? Ongelukkig sloer dit nog.

Die wet moet nog net deur die president in werking gestel word (met inagneming van die voorwaardes van die skikking wat in die gepubliseerde regulasies weerspieël word). Solidariteit wag vir uitsluitsel rondom die regulasies.  

Die skikking het gevolg ná ‘n klag wat Solidariteit by die Verenigde Nasies se IAO ingedien het.

Die skikking en regulasies bepaal onder meer die volgende:

• Niemand mag op grond van ras of weens rassebeleide afgedank word nie.

• Ondernemings se rasplanne moet buigsaam wees met geen absolute plafonne ten opsigte van bevordering nie.

• Rassebeleide moet tydelik wees en moet op regstelling fokus.

• Ras mag nie die enigste faktor wees wanneer rasplanne opgestel word nie.

• Die poel van beskikbare vaardighede in ʼn spesifieke beroep moet in ag geneem word.

Volgens dr. Dirk Hermann, bestuurshoof van Solidariteit, sal die regulasies, indien dit finaal gepubliseer word, maatskappye se rassebeleide ingrypend verander.

“Solidariteit sal nie huiwer om werkgewers hof toe te vat wat nie aan die skikkingsbepalings voldoen nie

“Die skikking bepaal dat werkgewers se rassebeleide buigsaam moet wees en die organisasie se eie omstandighede in ag neem,” sê Hermann.