Word jy deur jou eie perfeksionisme lamgelê?

Deur Anja van den Berg

Die valstrik van perfeksionisme

Op die oog af lyk perfeksionisme na ʼn goeie eienskap. Wie wil nou nie die beste weergawe van hulself wees nie? Navorsing deur die Universiteit van Bath toon egter dat perfeksioniste dikwels swakker presteer as hul eweknieë. Die rede? Hulle raak verlam deur ʼn vrees vir foute en kan selde projekte voltooi omdat hulle aanhou om klein besonderhede te verfyn wat min impak op die finale uitkoms het. Perfeksionisme klink dalk na ʼn positiewe karaktertrek, maar dit het dikwels negatiewe gevolge wat jou werk en persoonlike lewe kan beïnvloed.

Die koste van ‘perfek’

Dr. Brené Brown, ʼn skrywer en bekende navorser oor kwesbaarheid, het bevind dat perfeksionisme nie ʼn dryfveer vir sukses is nie, maar eerder ʼn skild is teen kritiek. Daar is ʼn hoë prys verbonde aan hierdie beskermingsmeganisme, onder meer verlaagde produktiwiteit, hoër stresvlakke, ʼn afname in kreatiewe denke, swak interpersoonlike verhoudinge en uitbranding.

Ons weet ook dat perfeksioniste tot drie keer meer geneig is om aan uitbranding te ly as hul nie-perfeksionistiese kollegas. Die ironie is dat hierdie strewe na perfeksie dikwels lei tot ʼn laer werkverrigting en laer lewensgehalte. Boonop verhoog dit ook angs- en depressievlakke. ʼn Onlangse studie in die Journal of Clinical Psychology het bevind dat perfeksionisme die afgelope drie dekades met tot 60% onder jong volwassenes toegeneem het. Hierdie toename hou direk verband met verhoogde vlakke van depressie en angs in dieselfde tydperk. Dit is dus noodsaaklik dat ons alternatiewe benaderings verken wat ʼn gesonder en meer volhoubare lewenstyl bevorder.

Die krag van ‘goed genoeg’

Die Japannese filosofie van “kaizen” – geleidelike, konstante verbetering – bied ʼn gesonder alternatief. Navorsing wat deur Psychological Science gepubliseer is, toon dat mense wat “goed genoeg” eerder as “perfek” nastreef, meer bereik en gelukkiger is. Hulle is meer geneig om projekte te voltooi en leer vinniger uit foute. Hulle pas ook makliker aan by verandering en ervaar meer werkstevredenheid.

Die konsep van “satisficing” – ʼn kombinasie van “satisfy” en “suffice” – wat deur die Nobel-pryswenner Herbert Simon ontwikkel is, ondersteun hierdie benadering. Sy navorsing wys dat die soeke na ʼn oplossing wat “goed genoeg” is dikwels tot beter resultate lei as die uitgerekte soektog na die “perfekte” antwoord.

Neurowetenskaplike navorsing het ook bevind dat ons beter vaar met probleemoplossing en innovasie wanneer die brein nie onder die druk van perfeksionisme is nie. Dié studie het gewys dat ʼn meer ontspanne benadering tot take tot verhoogde aktiwiteit lei in dié dele van die brein wat verantwoordelik is vir kreatiewe en laterale denke. Ons digitale wêreld vereis die vermoë om vinnig te kan aanpas en met nuwe, werkbare idees vorendag te kom. Die pad daarheen is nié perfeksionisme nie, maar uitnemendheid.

Die nuwe definisie van uitnemendheid

Ware uitnemendheid lê nie in perfeksie nie, maar in volhoubaarheid en impak. Prof. Carol Dweck se navorsing oor groeimentaliteit (“growth mindset”) wys dat mense wat foute as leergeleenthede sien, uiteindelik verder vorder as dié wat foutloosheid najaag. Die sleutel is om “goed genoeg” as ʼn strategiese keuse te sien, en nié as ʼn verslapping van standaarde nie. Dit beteken om slim te werk eerder as om harder te werk – om te fokus op dít wat werklik saak maak en die res te laat staan. Deur hierdie benadering te omhels, kan ons ʼn gesonder perspektief op prestasie en geluk ontwikkel.

Onthou: Elke keer wat jy “goed genoeg” bo “perfek” kies, skep jy ruimte vir groei, innovasie en volhoubaarheid. Op die lang termyn verseker hierdie uitkomste uitnemendheid en beter persoonlike welstand. As jy gereed is om jou welstand te prioritiseer en jou volle potensiaal te bereik, is Solidariteit daar om jou met elke tree wat jy in dié rigting neem te ondersteun. Raak betrokke en vind uit hoe ons jou beskerm, bemagtig en ontwikkel.