5 wenke om as jong bestuurder respek en leierskap te vestig

ʼn Leidende rol in jou organisasie is elkeen se droom. Vir onervare jong bestuurders kan dit moeilik wees om hierdie leierskapsrol te vervul weens onsekerheid oor hoe om hierdie nuwe gesagsposisie te benut sonder om dit te misbruik.

Deur Karen Waldeck

Is jy onlangs in ʼn bestuurspos aangestel? Miskien het jy so pas daardie bestuurstitel ontvang waaroor jy al vir so lank droom. Jy is opgewonde… maar ook so ʼn bietjie benoud. Hoe oorreed jy mense wat ouer of meer ervare is as jy om jou te respekteer? Hoe tree jy op as ʼn leier – sonder om voor te gee jy weet alles?

Die goeie nuus is: jy hoef nie ʼn boelie te wees om ʼn gerespekteerde leier te wees wat gesag afdwing nie. Hier is vyf wenke wat jou gaan help om in 2025 nie net ʼn bestuurder te wees nie, maar ’n leier wat mense wíl volg.

1. Begin met nederigheid, nie met ego nie

Die grootste fout wat jong bestuurders maak, is om te dink hulle moet alles weet en beheer. Die waarheid? Die beste leiers vra vrae. Hulle luister. Hulle erken wanneer hulle iets moet leer – en hulle toon respek vir hul span se kennis.

Om te sê: “Ek is nuut hier – maar ek is hier om te leer en saam te groei,” is nie ʼn teken van swakheid nie. Dit toon karakter, en karakter bou respek.

2. Bou verhoudings – eerlik en doelbewus

Leierskap begin by mense, nie by take nie. As jy wil hê mense moet jou respekteer, moet hulle voel jy gee regtig om. Ruim tyd in om jou span te leer ken: Wat dryf hulle? Wat frustreer hulle? Wat is hul loopbaandoelwitte? ’n Paar klein dingetjies kan ’n groot verskil maak. Byvoorbeeld, vra iemand hoe dit gaan – en luister werklik, gee erkenning vir klein suksesse, wees deursigtig oor hoekom besluite geneem word. Egte verhoudings lei tot lojaliteit – en lojaliteit is die basis vir ʼn sterk span.

3. Kommunikeer duidelik en konsekwent

Mense kan nie jou gedagtes lees nie – en verwarring is die vinnigste pad na wantroue. Jy hoef nie elke vergadering te lei nie, maar jy moet konsekwent wees in hoe en wat jy kommunikeer. Wees duidelik oor verwagtinge en volg gereeld op met terugvoering. Wanneer daar ʼn uitdaging is, deel dit met jou span en laat almal toe om saam aan die oplossing te werk; dit wys ook dat jy hulle vertrou en hulle opinies in ag neem. Onthou altyd dat kritiese denke ʼn noodsaaklik vaardigheid vir moderne leiers is!

4. Wees konsekwent én billik.

Jy gaan nie almal altyd gelukkig hou nie – maar jy kan konsekwent wees. Dit beteken die volgende:

• • As jy ʼn belofte maak, hou daarby.
• • Moenie werkers op so manier hanteer dat dit lyk of jy iemand voortrek nie.
• • Hanteer probleme met integriteit en eerlikheid.

As jou span sien jy is regverdig, sal hulle jou vertrou. En vertroue lei tot respek.

5. Wees jouself – en moenie bang wees vir groei nie

Jy hoef nie soos iemand anders te klink of op te tree om suksesvol te wees nie. Jou egtheid is jou grootste sterkpunt. Of jy nou ʼn introvert of ʼn energieke spanbouer is – jou span sal jou respekteer as jy eg is. Maar – hou altyd aan leer. Goeie bestuurders word groot leiers wanneer hulle aanhou groei. Doen kursusse, lees artikels, vra mentors vir raad. Jy hoef nie volmaak te wees nie, maar jy moet groei-willig wees.

Jy is bevoorreg om deel te wees van ʼn nuwe golf jong bestuurders wat nie in boksies pas nie, maar eerder hulle eie boksie bou. Verkies samewerking eerder as hiërargie. Bou verhoudings eerder as net die verkryging van resultate. Onthou ook altyd dat respek verdien moet word – nie vereis kan word nie.

Hou aan bou, bly nederig, wees konsekwent en wees jouself. Met dit alles in gedagte sal jy al die regte gereedskap in jouself hê wat jy nodig het om ʼn goeie leier te wees wat ʼn groot verskil kan maak.

Sluit aan by jou grootste aanlyn gemeenskap van werk – Solidariteit! Hier kan jy in jou moedertaal met kundiges netwerk, leer, mentorskap en netwerkgeleenthede benut en aan die beste weergawe van jouself slyp.