ADHD in die werkplek

Nico Strydom

Daar is wêreldwyd ʼn toenemende bewustheid rakende die impak van aandaggebrek-hiperaktiwiteitsteuring (ADHD) in die werkplek.

Volgens ʼn ontleding deur Amerika se nasionale sentrum vir biotegnologie-inligting (NCBI) is daar na raming sowat 360 miljoen volwassenes wêreldwyd wat simptome van ADHD het.

Die voorkoms van ADHD-simptome in diegene wat deel van die arbeidsmag is, is iets wat dikwels ongediagnoseer en ondergerapporteer is, sê Debbie Goodman, uitvoerende hoof van Jack Hammer Global, Afrika se grootste werwer van uitvoerende personeel.

“Professionele mense met ADHD staar unieke uitdagings in die gesig tydens aanstellingsprosesse en assesserings, en hulle kan oor die hoof gesien word vir bevorderings ten spyte van hul talente en vermoëns. Hierdie werklikheid het ʼn negatiewe impak op beide die werknemer en die maatskappy wat poog om toptalent te lok en te behou, maar kan aangespreek word met groter bewustheid van die positiewe potensiële bydrae van individue met ADHD, en deur neurodiversiteit in die arbeidsmag te ondersteun.”

Volgens Goodman was daar die afgelope paar jaar ʼn toename in ADHD-diagnoses in volwassenes, veral onder vroue. Indien ʼn werkgewer nie bewus is dat ʼn werknemer aan ADHD ly en die moontlike gevolge daarvan nie kan dit dikwels aangesien word as gebrekkige werkprestasie in terme van onder meer tydsbestuur, organisering en aandagafleibaarheid.

Goodman sê dit is belangrik om te verstaan ​​dat ADHD nie ʼn gestremdheid is nie, maar ʼn ander manier om inligting te verwerk. “Baie professionele persone met ADHD is buitengewoon talentvolle en kreatiewe innoveerders. Bewustheid en aanvaarding van neurodiversiteit is noodsaaklik vir die skep van ondersteunende werksomgewings, en ʼn stap in die regte rigting vir maatskappye om te verseker dat hulle hierdie werknemers behou en die beste uit hulle kry.”

Dr. Laura Comrie, ʼn psigiater wat by Netcare Akeso Kenilworth praktiseer, sê indien ADHD nie behandel word nie kan dit tot ʼn ernstige gebrek aan selfvertroue sowel as lae akademiese of loopbaanprestasie lei.

Daar is drie verskillende subtipes ADHD – die hiperaktief-/impulsiewe tipe; die onoplettende tipe en die gekombineerde tipe. “ADHD is geneig om meer algemeen by mans te voorkom, met die hiperaktiewe/impulsiewe-tipe wat die algemeenste is. Hierdie individue sal dikwels ʼn werk kies wat fisiese aktiwiteit behels eerder as om by ʼn lessenaar te sit. Onoplettende ADHD is meer algemeen by vroue. Dit is moontlik dat onoplettende ADHD meer ondergediagnoseer is omdat dit minder van ʼn sigbare bekommernis is.”

“Diegene met ADHD het dikwels ʼn sterk entrepreneursgees aangesien hulle geneig is om kreatiewe denkers te wees en ongelooflike vlakke van fokus kan ervaar op onderwerpe waaroor hulle passievol is. Terselfdertyd kan hulle regtig sukkel met meer alledaagse take en kan die tipe gedrag frustrerend vir familielede en kollegas wees, maar dit is buite die persoon se beheer. Omdat dit ʼn neurologiese afwyking is, vereis dit dikwels mediese ingryping om dit te help reguleer.”

Solidariteit se werk is om mense in staat te stel om hul roeping na te jaag. Ons wil egter nie hê mense moet bloot net werk nie; ons wil hê hulle moet goed kan werk en hulle volle potensiaal bereik. Elkeen wat wíl werk, móét kan werk. Solidariteit beskerm jou teen diskriminasie en uitbuiting in die werkplek. Skep jou gratis profiel op Solidariteit, sluit aan as lid en wees verseker dat jy in jou loopbaan kan floreer, nie ten spyte van ADHD nie, maar te danke daaraan!