Wat werkgewers wens skoliere reeds op skool sou leer

Deur Liza Joubert

ʼn Matrieksertifikaat of naskoolse kwalifikasie is belangrik, maar dit is nie die enigste sleutel tot sukses in die werkplek nie. Al hoe meer werkgewers sê jong mense wat die arbeidsmark betree, beskik oor sterk akademiese kennis, maar sukkel soms met die praktiese vaardighede wat in die werkplek vereis word.

Volgens die World Economic Forum se Future of Jobs Report 2025 is sogenaamde “menslike vaardighede” – soos kommunikasie, probleemoplossing, aanpasbaarheid en selfbestuur – van die belangrikste eienskappe waarna werkgewers wêreldwyd soek. Tegniese kennis alleen is nie voldoende om jong mense vir die arbeidsmark voor te berei nie. Werkgereedheid, indiensneembaarheid en praktiese werkplekvaardighede is net so belangrik.

Hier is sewe vaardighede wat werkgewers wens meer jong mense reeds op skool ontwikkel.

1. Professionele kommunikasie

Om ʼn e-pos te skryf, professioneel oor die telefoon te kommunikeer of met selfvertroue aan ʼn vergadering deel te neem, is vaardighede wat in byna elke beroep nodig is.

Goeie kommunikasie help werknemers om sterker verhoudings met kollegas, kliënte en bestuurders te bou.

2. Tydsbestuur

In die werkplek is daar sperdatums, vergaderings en verskeie take wat gelyktydig aandag verg.

Leerders wat reeds op skool leer om hul tyd goed te bestuur, vind dit dikwels makliker om by die eise van studie en werk aan te pas.

3. Probleemoplossing

Werkgewers waardeer mense wat nie net probleme raaksien nie, maar ook moontlike oplossings voorstel.

Hierdie vaardigheid ontwikkel wanneer jong mense aangemoedig word om selfstandig te dink, vrae te vra en nuwe benaderings te probeer.

4. Aanpasbaarheid

Die wêreld van werk verander vinnig. Nuwe tegnologie, kunsmatige intelligensie en veranderende werkwyses beteken dat werknemers bereid moet wees om voortdurend nuwe vaardighede aan te leer.

Mense wat verandering as ʼn geleentheid beskou, pas gewoonlik makliker by nuwe omgewings aan.

5. Spanwerk

Min beroepe vereis dat mense heeltemal alleen werk. Om na ander te luister, konflik professioneel te hanteer en saam na oplossings te werk, is vaardighede wat reeds deur sport, kultuuraktiwiteite en groepsprojekte ontwikkel kan word.

6. ʼn Gewilligheid om aan te hou leer

Een van die belangrikste eienskappe waarna werkgewers vandag kyk, is nie hoeveel iemand reeds weet nie, maar hoe bereid hulle is om aan te hou leer.

Kort kursusse, professionele ontwikkeling en selfstudie help werknemers om relevant te bly in ʼn arbeidsmark wat voortdurend verander.

7. Leierskap

Werkgewers soek nie net toekomstige bestuurders nie – hulle soek mense wat verantwoordelikheid neem, inisiatief toon en ander positief kan beïnvloed. Leierskap begin reeds op skool deur betrokke te raak by sport, kultuur, gemeenskapsprojekte of leerlingrade.

Solidariteit se #LeerMyLeierskap-reeks help jong mense juis om hierdie vaardighede doelbewus te ontwikkel en dit prakties toe te pas. Die reeks is spesifiek ontwerp om jong mense toe te rus met praktiese leierskapsvaardighede, soos verantwoordelikheid, besluitneming, empatie en selfbewustheid. Deur realistiese scenario’s en interaktiewe aktiwiteite leer leerders hoe om met selfvertroue leiding te neem – by die skool, tuis en in hul gemeenskappe.

Die kursus fokus op karaktervorming, verantwoordelikheid, diensbare leierskap en die vermoë om ʼn positiewe verskil te maak – met of sonder ʼn amptelike leierskapsrol.

Hoe kan ouers help?

Ouers hoef nie al die antwoorde te hê nie. Hulle kan wel hul kinders aanmoedig om van jongs af verantwoordelikheid vir hul eie ontwikkeling te neem deur:

• • saam oor moontlike loopbane navorsing te doen;
• • geleenthede vir skaduwerk of vakansiewerk te soek;
• • kommunikasie- en leierskapsvaardighede aan te moedig; en
• • gebruik te maak van hulpmiddels soos loopbaanvoorligting en aanlyn kursusse om praktiese vaardighede te ontwikkel.

Solidariteit se Skoliere-aanbod bied verskeie hulpmiddels wat jong mense help om hierdie oorgang makliker te maak – van loopbaanvoorligting en die Belangstellingsbepaler tot aanlyn kort kursusse wat praktiese vaardighede ontwikkel en hulle beter voorberei vir studies én die werkplek.

Meer as net goeie punte

Goeie akademiese prestasie bly natuurlik belangrik, maar dit is selde die enigste faktor wat ʼn loopbaan bepaal. Jong mense wat verantwoordelikheid neem, goed kommunikeer, kan saamwerk en bereid is om voortdurend te leer, is dikwels diegene wat op die lang termyn die grootste sukses behaal.

Registreer dus vandag jou gratis profiel op Solidariteit-aanlyn en ontdek hoe Solidariteit se Skoliere-aanbod jou kind kan help om die vaardighede te ontwikkel wat hulle vir studies, die werkplek en die toekoms nodig het.

Laat jou kind hul toekoms in hul eie hande neem!