Biddende ontvangsdame

Deur Mari Ferreira, Solidariteit-netwerkorganiseerder

Daar is mense wat eenvoudig net hul werk doen. En dan is daar mense soos Nelia Duvenage – iemand wat met elke asemteug, elke glimlag en elke telefoongroet ʼn verskil maak. Sy is nie net ʼn ontvangsdame nie. Sy is nie net ʼn administratiewe steunpilaar by Solidariteit Helpende Hand nie. Sy is ʼn kantoorpraktisyn in die volste, mooiste sin van die word, en deel van die Solidariteit Kantoorpraktisynsnetwerk – ʼn gemeenskap wat administratiewe personeel verbind, bemagtig en inspireer.

Ek het verlede week met ʼn kollega oor Nelia se passievolle diens gesels. Haar naam het weer en weer opgeklink, altyd met respek, bewondering en ʼn tikkie verwondering. Ek móés haar net self gaan ontmoet. En daar, agter die ontvangstoonbank van Helpende Hand, het ek haar gesien: ʼn vrou wat werklik lig uitstraal.

Meer as ʼn posbenaming

Nelia werk al vyf jaar by Helpende Hand. Sy het al verskeie rolle in haar loopbaan beklee, maar administrasie bly haar hart en passie. Elke oggend staan sy op met ʼn huppel in haar stap – nie omdat sy móét werk nie, maar omdat sy wíl. Die eerste oproep van die dag is vir haar nie net ʼn taak nie; dit is ʼn geleentheid om iemand se dag op te helder.

“Mense bel soms moedeloos, hartseer of kwaad,” vertel sy, “maar ek weet ek kan vir hulle hoop gee, al is dit net deur te luister en ʼn bemoedigende woord te spreek.”

Vir haar is kliëntediens meer as beleefdheid. Dit is ʼn roeping, ʼn uitgestrekte hand. ʼn Geleentheid om God se liefde deur eenvoudige, praktiese diens te wys.

Die vrou wat God se genade uitstraal

Agtien jaar gelede het Nelia ʼn pad begin stap wat haar lewe onherroeplik sou verander. Ná ʼn epileptiese aanval en ʼn reeks toetse, het die dokter haar meegedeel dat sy ʼn graad 3-breingewas het. Sy is 18 maande gegee om te leef.

“Dit was vir my onaanvaarbaar,” sê sy. “Ek het op my knieë gebly. Ek het gebid, vasgehou en geveg, saam met die Here.”

Op 9 November 2024, presies 18 jaar later, het sy haar lewe saam met familie, vriende en geliefdes in die Liedjietuin by die Voortrekkermonument gevier – nie net as ʼn oorlewende nie, maar as ʼn getuie van God se oorweldigende genade. Haar man, Dirk – haar rots en steunpilaar – het elke tree saamgestap.

En wanneer sy praat, hoor jy dit duidelik: haar stem dra die klank van iemand wat deur vuur gegaan het, maar die reuk van rook kleef nie aan haar nie.

Die krag van ʼn kantoorpraktisyn

Nelia se rol mag op papier dalk eenvoudig lyk – ontvangs, oproepe, administrasie – maar dit is in werklikheid die spil waarom soveel ander se werk draai. Dit is presies wat die Solidariteit Kantoorpraktisynsnetwerk vier: dat administratiewe personeel die stil en kragtige enjin is wat organisasies aan die gang hou. Hulle is die eerste stem wat kliënte hoor, die hande wat inligting organiseer en dikwels die hart wat warmte na ʼn koue wêreld bring.

Nelia beliggaam presies waarom die netwerk bestaan: om hierdie onmisbare rolspelers te erken, te verbind en te bemagtig.

ʼn Lewende roeping

Nelia hou ʼn gebedsboekie byderhand. Wanneer sy nie iemand direk kan help nie, skryf sy hul naam daarin neer en bid vir hulle. Sy hou haar ore oop – op die pad, in winkels, op die radio – altyd op soek na inligting wat iemand anders dalk kan help.

Sy vertel ook van haar ma, haar grootste rolmodel: ʼn dinamiese vrou wat as mediese sekretaresse gewerk het en in ʼn oogwink ʼn fees vir 60 mense kon voorberei. Admin vloei deur hul are, dink ek dadelik.

Haar raad aan ander kantoorpraktisyns

• • Glo en vertrou. Wees dankbaar. Hou aan bid, daar is krag in gebed.
• • Doen wat jy moet doen wanneer jy dit moet doen, sodat jy kan doen wat jy wil doen wanneer jy dit wil doen. Moenie uitstel nie; van uitstel kom afstel.
• • Leef in die oomblik en leef voluit.
• • Onthou: jou werk kan jou roeping wees.

ʼn Boodskap vir ons almal

Terwyl ek by die deur uitstap, dink ek na oor hoeveel van ons elke dag by ʼn ontvangs instap sonder om te besef watter krag agter daardie lessenaar sit. ʼn Kantoorpraktisyn soos Nelia wys vir ons dat administrasie nie net oor dokumente en telefoonnommers gaan nie. Dit gaan oor mense, hoop, en ʼn hart wat bereid is om te dien.

Die Solidariteit Kantoorpraktisynsnetwerk is trots om sulke stories te deel. In ʼn wêreld waar almal haastig is, is dit mense soos Nelia wat ons daaraan herinner dat jy ʼn verskil kan maak – elke dag, met elke oproep en elke glimlag.

Ken jy ook iemand wie se storie ander kan inspireer? Ek sal dit graag wil hoor. E-pos my gerus by mari@solidariteit.co.za.