Ambagslui: Bou aan jou toekoms met Solidariteit se Ambagnetwerk

Deur Leré Nel

Jy, as ambagsman of -vrou, is een van die belangrikste boustene van ʼn gesonde ekonomie. Sonder vaardige tegnici, vakmanne en ambagslui staan verskeie bedrywe stil. Sonder ambagslui staan munisipale geriewe en infrastruktuur stil. En Suid-Afrika staar ʼn ernstige tekort in die gesig. Dr. Blade Nzimande, minister van wetenskap, tegnologie en innovasie, het in sy toespraak, by die aankondiging van die staat se poging om ambagslui-tekorte in Suid-Afrika aan te spreek, gesê dat die vraag na gekwalifiseerde ambagslui teen 2030 sal groei tot sowat 30 000 per jaar. Hierdie  enorme aanvraag plaas enorme druk op tegniese skole en opleidingsinstellings.

Uitdagings in tegniese onderwys

Een van die grootste struikelblokke lê in die krimpende getal tegniese onderwysers. Skoliere kry al hoe minder blootstelling aan tegniese vakrigtings, wat beteken dat hulle nie altyd vroeg genoeg kan bepaal of ʼn ambag die regte loopbaan vir hulle is nie. Alhoewel dit nie ʼn voorvereiste is om tegniese vakke op skool te hê om tot Sol-Tech toegelaat te word nie, bly dit ʼn uitdaging dat jong mense se bewusmaking van die ambagswêreld só beperk word.

Hier speel Solidariteit Ambagnetwerk en sy instellings ʼn belangrike rol. Sol-Tech, Ajani en die Ajani-vaktoetssentrum is almal gebore uit die behoefte om voortdurend goed opgeleide ambagslui aan die bedryf te lewer. Hulle werk nie net saam om jong mense op te lei nie, maar ook om hulle te verbind met werkgewers wat dringend op soek is na gekwalifiseerde vakmanne en -vroue.

Voortgesette leer is die antwoord

Om ʼn vaktoets te slaag is ʼn groot mylpaal, maar dit is nie die eindstreep nie. Soos Stef Pretorius, koördineerder van die Solidariteit Ambagnetwerk, dit stel: “In ʼn werklikheid waar die politieke bedeling dikwels teen jou tel, sal bykomende vaardighede altyd die pendulum in jou guns swaai.”

Dit is waar Solidariteit Leer inkom. Met nagenoeg 150 voortgesette leer-kursusse kry ambagslui, wat ook Solidariteit-lede is, die geleentheid om hul kennis en vaardighede voortdurend te verbreed. Dit beteken dat hulle nie net relevant bly nie, maar ook teen die beste in die bedryf kan meeding. Voortgesette leer onderskei die gewone vakman van die uitmuntende een.

Beskerming en gemeenskap

Solidariteit se Ambagnetwerk speel ook ʼn waghondrol en dra by tot die beskerming van die beroep self. Bedreigings, soos swak deurdagte wetgewing en beperkende regulasies, word op die hoogste vlakke aangespreek en in die hof uitgedaag waar nodig. Die uitbuiting van jong ambagslui in die werkplek word nie geduld nie en Solidariteit tree namens sy lede op waar onreg plaasvind.

Suid-Afrika se toekoms kan eenvoudig nie sonder ambagslui gebou word nie. Solidariteit se Ambagnetwerk staan daarom as ʼn betroubare vennoot langs elke vakman en -vrou – van die eerste kennismaking met die beroep tot by die vestiging van ʼn ryk ervaringsbank en die aanwys van mentors vir die volgende geslag.

Die uitdaging is groot, maar die oplossing is haalbaar: Saam bou ons nie net vaardighede nie, maar ook toekomssekerheid.

Bly ingeskakel by die Solidariteit Ambagnetwerk om seker te maak jý is deel van die oplossing!