Die onmisbare rol van maatskaplike werkers in skole

Deur Marné Pienaar

Kinders staar vandag talle uitdagings in die gesig. Die rol van ʼn maatskaplike werker by ʼn skool speel dus ʼn kritieke rol in die gesonde opvoeding van kinders.

Maatskaplike werkers bied nie net ondersteuning aan leerders wat met emosionele, sosiale en gedragskwessies sukkel nie, maar bemagtig ook leerders om leerverwante uitdagings te oorkom.

Dr. Marelize Vergottini, ʼn senior lektor aan die Noordwes-Universiteit (NWU), deel haar insigte oor hierdie belangrike veld en hoe maatskaplike werkers ʼn verskil in die lewens van leerders kan maak.

Dr. Vergottini het haar voorgraadse studie aan die Universiteit van die Vrystaat voltooi, en haar meesters- en PhD-graad aan die NWU verwerf. Sy is ook ʼn ma van twee seuns.

Volgens dr. Vergottini het die teenwoordigheid van maatskaplike werkers in Suid-Afrikaanse skole oor die afgelope 15 jaar aansienlik toegeneem. “Ongelukkig lyk die samestelling van maatskaplike werkers in skole in elke provinsie tans anders, wat beteken daar is geen eenvormigheid nie,” verduidelik sy.

In sommige provinsies moet skole self maatskaplike werkers aanstel indien die provinsiale Departement van Onderwys nie daarvoor voorsiening maak nie. Hierdie verskeidenheid kan lei tot ongelykheid in die ondersteuning wat leerders ontvang, veral in skole met beperkte hulpbronne.

Maatskaplike werkers in skole moenie net oor ʼn deeglike kennis van hul eie regsraamwerk beskik nie, maar ook van die wette en beleide wat die onderwysstelsel rig. “Wette soos die Kinderwet (No. 38 van 2005) en die Wet op Kinderberegting (No. 75 van 2008) is van kardinale belang, sowel as ander wetlike raamwerke soos die Suid-Afrikaanse Skolewet (No. 84 van 1996) en die Wet op Beskerming van Persoonlike Inligting (No. 4 van 2013),” sê dr. Vergottini. Hierdie wette en beleide help om die werk van maatskaplike werkers te rig en te struktureer, en verseker dat leerders die nodige ondersteuning ontvang.

“Dit is noodsaaklik dat maatskaplike werkers in skole ʼn gesonde etiese praktyk verseker,” beklemtoon dr. Vergottini. In skole waar maatskaplike werkers dikwels alleen werk, sonder die voordeel van gereelde toesig of konsultasie, is dit hul eie verantwoordelikheid om op hoogte te bly van relevante beleide en etiese kodes. Voortgesette professionele ontwikkeling en deelname aan groeptoesig is ook noodsaaklik om die gehalte van hul diens te handhaaf.

Maatskaplike werkers in skole moet ʼn verskeidenheid hindernisse hanteer wat leerders kan beïnvloed. Dit sluit sistemiese kwessies soos oorvol klaskamers in, asook intrinsieke leerhindernisse soos gesondheidskwessies, en maatskaplike hindernisse soos armoede, tienerswangerskappe, trauma en dwelmmisbruik. “Maatskaplike werkers speel op elke vlak hiervan ʼn rol om hierdie hindernisse te oorkom en leerders te ondersteun,” verduidelik dr. Vergottini.

Die werk van maatskaplike werkers in skole is van onskatbare waarde. Hulle bied nie net ondersteuning en leiding aan leerders nie, maar dien ook as ʼn skakel tussen die skool en die breër gemeenskap. Met ʼn deeglike begrip van die regsraamwerk, etiese praktyk en die unieke uitdagings wat leerders in die gesig staar, kan maatskaplike werkers ʼn beduidende impak hê op die sukses en welstand van leerders.

Die Solidariteit Maatskaplikewerkersnetwerk bied deurlopend voortgesette professionele opleiding (VPO) aan maatskaplike werkers en bespreek insiggewende onderwerpe soos die belangrikheid van maatskaplike werkers in skole. Sluit aan by Solidariteit, raak deel van jou beroepsnetwerk en maak seker dat jy nie die volgende opleidingsessie misloop nie. Solidariteit-lede kan hierdie sessies gratis bywoon!