Hier is wat die Solidariteit Regsnetwerk in 2024 vermag het

Solidariteit se regsnetwerk het in 2024 bewys dat dit ʼn onmisbare rolspeler in die versterking en beskerming van die regsberoep is. Met ’n fokus op gemeenskapsbou, opleiding en die bevordering van regverdigheid, het die netwerk talle mylpale bereik wat sy toewyding aan sy lede en die beroep as geheel weerspieël.

Geleenthede wat saak maak

Die Solidariteit Regsnetwerk het sy invloed in die regsberoep versterk deur aktiewe deelname aan verskeie geleenthede van belang:

• Akademia se LLB-simposiums: In Maart en Augustus was die netwerk betrokke as spreker en borg by dié simposiums wat in Centurion en die Paarl aangebied is. Hierdie byeenkomste het ’n platform geskep waar regsgeleerdes en studente waardevolle insigte kon deel.
• Fondsinsamelingsgholfdag: In September het die Solidariteit Regsnetwerk saam met die Solidariteit Finansiesnetwerk hul eerste gholfdag vir fondsinsameling aangebied. Hierdie suksesvolle inisiatief het nie net fondse vir studiebeurse ingesamel nie, maar ook as ʼn netwerkgeleentheid vir persone in regs en finansiële beroepe gedien.
• Borgskap van die Gauteng Prokureursvereniging se gholfdag: Dié netwerk het ook as borg opgetree by hierdie gesogte byeenkoms in Randburg, wat die beroep en sy gemeenskap verder versterk het.

Waghond vir gelykheid en regverdigheid

In 2024 het die Solidariteit Regsnetwerk sy rol as waghond met oortuiging vervul:

• Teenstand teen die LPC se taalbeleid: Die netwerk het hom teen die drakoniese taalbeleid van die Regspraktykraad (LPC) uitgespreek, wat die gebruik van Afrikaans in die regsberoep benadeel. Hierdie stryd is steeds aan die gang.
• Klag teen regter Motha: ’n Formele klag is by die Regterlike Dienskommissie ingedien na aanleiding van onvanpaste uitlatings deur regter Motha in die hof.
• Sektorkodes: Die netwerk het ook formeel met die proses begin om sektorkodes, wat diskriminasie binne die professie kan bevorder, binne die regsberoep teen te staan.

Innoverende opleiding en ondersteuning

Die Solidariteit Regsnetwerk het sy toewyding tot opleiding en ondersteuning van regsgeleerdes versterk deur:

• Webinaar-reeks: In 2024 is die eerste aanlyn webinaar-reeks afgeskop, met temas wat praktiese leiding aan studente en kandidaatprokureurs bied. Hierdie inisiatief sal voortgaan in 2025 en dien as ’n waardevolle aanvulling tot die netwerk se slypskool.
• Verbintenis tot werkgeleenthede: Die netwerk het voortgegaan om regsfirmas en kandidate met mekaar te verbind, en sodoende loopbaangeleenthede geskep wat spesifiek op die behoeftes van die professie fokus.

Met sy sterk fokus op opleiding, die bevordering van Afrikaans, en die beskerming van regte binne die regsberoep, het die Solidariteit Regsnetwerk in 2024 ’n reuseverskil gemaak. Dit is ’n netwerk wat nie net praat oor regverdigheid nie, maar dit daadwerklik uitleef. Die toekoms vir regsgeleerdes in Suid-Afrika lyk helderder met ’n netwerk wat só doelgerig en toegewyd is aan sy lede en die breër beroep.

Die Solidariteit Regsnetwerk bly ’n bewys van wat bereik kan word deur samewerking, volgehoue aksie en die strewe na uitnemendheid.