Hoe kies ek die regte universiteitsgraad?

Deur Liza Joubert

Om die verkeerde graad op universiteit te studeer, kan ʼn duur fout wees. Die keuse is egter nie altyd maklik nie, veral omdat die wêreld van werk voortdurend verander en daar gereeld nuwe beroepe ontstaan.

Hier is ʼn paar wenke wat jy kan volg om jou te help om die regte graad te kies, met inagneming van toekomstige loopbaanmoontlikhede en die waardevolle insette van loopbaanvoorligters.

1. Ontdek jou belange en sterkpunte

Begin deur jou belange en sterkpunte te ondersoek en neer te pen. Wat geniet jy om te doen? Waarin is jy goed? Loopbaanvoorligters kan jou help om hierdie vrae te beantwoord deur gebruik te maak van persoonlikheidstoetse en vaardigheidsassesserings. Deur jou passies en talente te identifiseer, kan jy beter bepaal in watter rigting jy wil beweeg.

Solidariteit se belangstellingsbepaler kan jou in die regte rigting stuur om jou belange vas te stel.  

2. Verken toekomstige loopbaanmoontlikhede

Die wêreld van werk is konstant besig om te verander en baie van die beroepe wat in die toekoms gaan bestaan, bestaan nog nie vandag nie. Daarom is dit belangrik om bewus te wees van toekomstige loopbaantendense en die vaardighede wat in aanvraag sal wees.

3. Konsulteer met loopbaanvoorligters

Loopbaanvoorligters kan ʼn waardevolle bron van inligting en leiding wees wanneer jy oorweeg watter graad om te volg. Hulle het toegang tot die jongste loopbaaninligting en kan jou help om die verskillende studierigtings en die beroepe wat daarmee geassosieer word, te verstaan. Hulle kan ook help om jou te lei na programme en universiteite wat jou die beste kans gee om suksesvol te wees in jou gekose veld. Solidariteit beskik oor ‘n netwerk van loopbaanvoorligters wat jy kan kontak om jou te help om die regte keuse vir jou toekoms te maak.

4. Oorweeg die langtermynvooruitsigte

Wanneer jy ʼn graad kies, is dit belangrik om die langtermynvooruitsigte van die beroep wat jy oorweeg in ag te neem. Sommige beroepe kan dalk op die korttermyn goed betaal, maar het beperkte groei- of bevorderingsgeleenthede. Ander beroepe mag dalk meer stabiele en langdurige loopbaangeleenthede bied. Dit is ook belangrik om na te vors hoe die beroep kan verander met tegnologiese vooruitgang en ander toekomstige neigings.

5. Wees buigsaam en aanpasbaar

Die vinnige tempo van verandering in die moderne werkplek beteken dat buigsaamheid en aanpasbaarheid belangriker is as ooit tevore. Wanneer jy ʼn graad kies, oorweeg programme wat jou toelaat om ʼn wye reeks vaardighede te ontwikkel en wat buigsaamheid bied om jou studie aan te pas soos jou belangstellings en die werkplek verander.

6. Voortgesette leer

Die konsep van een kwalifikasie wat jou vir die res van jou loopbaan gaan dien, is besig om te verdwyn. Voortgesette leer en professionele ontwikkeling is noodsaaklik om relevant en mededingend te bly in die werkplek van die toekoms.

7. Haal asem

Laastens, haal asem. Deesdae is dit so maklik om jou beroep te verander en studierigtings vereis diverse vaardighede. Jy kan altyd verder studeer, of addisionele kursusse doen om jou beroep te verander. Jy gaan oukei wees!

Die keuse van die regte universiteitsgraad is ʼn belangrike stap in die rigting van ʼn suksesvolle loopbaanpad. Vertrou die reis, pak uitdagings met grasie aan en gryp geleenthede aan.

Die toekoms is blink! Skep jou gratis profiel op Solidariteit, want ons stap elke tree van jou loopbaanpad saam met jou.