Jou handleiding vir die belastingseisoen

Deur Ané Janse van Rensburg

Belasting het beslis ʼn taal van sy eie en behoort met ʼn handleiding, ʼn reeks videoleerhulpbronne en ʼn woordeboek te kom. Die eerste stap om jou belasting baas te raak, is om die taal te verstaan.

Miskien is jy al jare lank deel van die werkersmag en taamlik gesout in die belastingspeletjie, maar hierdie terme kan tog soms vir Jan Alleman ʼn vreeslike kopseer veroorsaak. Daar is egter hoop! Met die regte hulp en bystand is dit moontlik om jou belasting baas te raak.

Hier is ʼn paar belastingsterme wat jy vanjaar kan leer om jou belasting vir ʼn ses te slaan!

Aftrekbare uitgawes: Kapitaaluitgawes wat aangegaan word om inkomste te genereer, byvoorbeeld operasionele uitgawes (soos selfoonkoste of reisuitgawes) en aangeskafde bates (soos ʼn motorvoertuig wat jy vir jou werk moet gebruik).

Belasbare inkomste: Die inkomste (ná sekere toegelate aftrekkings soos pensioenbydrae) waarop belasting gehef word.

Belasting op Toegevoegde Waarde (BTW): ʼn Belasting van 15% op goedere en dienste.

Bruto inkomste: Totale inkomste voor enige aftrekkings of vrystellings.

Direkte belasting: Belasting op individue en regspersone (maatskappye, trusts, ens.) se inkomste.

Dividend: Winste wat aan aandeelhouers uitbetaal word aan die einde van ʼn maatskappy se finansiële jaar.

Dividendbelasting: ʼn Weerhoude belasting van 10% op dividenduitbetalings wat die maatskappy namens ʼn aandeelhouer betaal.

eFiling: Die Suid-Afrikaanse Inkomstediens (SAID) se aanlyn diens vir die indiening van belastingopgawes en betalings.

Finansiële / belastingjaar: ʼn Tydperk van 12 opeenvolgende maande wat vir ʼn individu strek vanaf 1 Maart tot 28 Februarie.

Indirekte belasting: Belasting op die aankoop van goedere of dienste, byvoorbeeld BTW in Suid-Afrika.

Inkomstebelasting: Belasting op alle belastingbetalers se belasbare inkomste.

Invoerbelasting: Dit is ʼn belasting wat deur ʼn land se doane-owerhede ingevorder word op invoere en sommige uitvoere.

Kapitaalwinsbelasting: Belasting wat betaal moet word wanneer ʼn individu of ʼn sakeonderneming ʼn bate of eiendom verkoop of afskryf.

Lopende Betaalstelsel (LBS): Inkomstebelasting wat direk van ʼn werknemer se salaris afgetrek word deur die werkgewer.

Netto inkomste: Inkomste wat oor is nadat kostes en uitgawes van die bruto inkomste afgetrek is.

Omsetbelasting: ʼn Vrywillige belastingstelsel vir klein ondernemings.

Oudit: ʼn Ondersoek na ʼn sakeonderneming of individu se belastingsake.

Voorlopige belasting: Belasting wat twee keer per jaar betaal word deur mense met ʼn onreëlmatige inkomste (soos kommissie).

Vrygestelde dienste: Dienslewering waarop geen BTW gehef of geëis kan word nie, soos finansiële dienste en onderwys.

Werkloosheidsversekeringsfonds (WVF): Voorsien voordele vir mense wat werkloos is of nie kan werk nie.

Solidariteit wil saam met jou die pad na sukses stap – hetsy dit in jou beroep of met jou belasting is. Skep vandag jou gratis Solidariteit-profiel en benut ʼn reeks hulpbronne soos die Belastingsgids wat jou in hierdie taak kan bemagtig.