Kantoorpraktisyn, belê in jou toekoms met kursusse vir voortgesette leer

As ʼn kantoorpraktisyn is jy die spilpunt wat ʼn besigheid glad laat funksioneer, en danksy voortgesette leer kan jy jou waarde nóg verder verhoog! Solidariteit bied jou gratis toegang tot nagenoeg 150 kortkursusse in Afrikaans, sodat jy jouself kan bemagtig sonder om jou werk- of gesinslewe in te boet. Van kursusse oor tegnologiese vaardighede tot administratiewe uitnemendheid, hier is ʼn gulde geleentheid om jou loopbaan vorentoe te neem. Lees meer hier.

Deur Mari Ferreira, netwerkorganiseerder by Solidariteit

Daar is min dinge so waardevol soos ʼn kantoorpraktisyn wat nie net sy of haar werk doen nie, maar dit met trots, toewyding en uitnemendheid aanpak. Jy is die hartklop van enige organisasie – die een wat orde bring waar chaos dreig, die een wat verseker dat prosesse glad verloop en dat alles op die regte tyd op die regte plek is. Sonder jou sou besighede sukkel om te funksioneer. Dit is daarom so belangrik vir jou loopbaan om te bly groei, leer en ontwikkel.

Voortgesette leer: ʼn belegging in jouself

Die wêreld verander vinniger as ooit. Tegnologie ontwikkel teen ʼn ongelooflike tempo, nuwe sagteware en administratiewe prosesse word gedurig bekendgestel, en maatskappye verwag van hul personeel om op hoogte te bly van die nuutste verwikkelinge. Dit kan oorweldigend voel, maar hier is die waarheid: Elke keer wat jy ʼn nuwe vaardigheid aanleer, verhoog jy jou waarde. Jy maak jouself onmisbaar. Jy bewys dat jy aanpasbaar, vooruitdenkend en vindingryk is – eienskappe wat jou loopbaan vorentoe dryf.

Waarom is dit belangrik om aan te hou leer?

• • Aanpasbaarheid – Hoe meer jy leer, hoe makliker kan jy nuwe uitdagings aanpak en by veranderende werksomstandighede aanpas.
• • Probleemoplossing – Deur nuwe kennis op te doen, leer jy om slimmer en meer doeltreffend oplossings vir daaglikse uitdagings te vind.
• • Persoonlike groei – Jou loopbaan is nie net ʼn werk nie, dit is ʼn reis van selfontdekking en verbetering.
• • Nuuskierigheid – Hoe meer jy leer, hoe meer wil jy weet! Dit hou jou gemotiveerd en geïnspireerd.

Kortkursusse: ʼn maklike weg na groei

Baie mense stel voortgesette leer uit omdat hulle dink dit is tydrowend en duur, maar dit hoef nie so te wees nie! Solidariteit bied aan sy lede gratis toegang tot nagenoeg 150 kortkursusse – in Afrikaans, aanlyn en wat jy op jou eie tyd kan doen. Dit beteken jy kan leer sonder dat dit nodig is om jou werk- of gesinslewe prys te gee. Dit is ʼn belegging in jouself, sonder die druk van voltydse studie.

Die voordele van kortkursusse

• • Loopbaanbevordering – Leer nuwe vaardighede aan wat jou kan help om bevorderings en salarisverhogings te verdien.
• • Professionele ontwikkeling – Bly op hoogte van die nuutste tegnologie en tendense in jou veld.
• • Laat jou CV uitstaan – Wys toekomstige werkgewers dat jy proaktief en toegewyd aan jou groei is.
• • Verbeter jou werksekuriteit – Hoe meer vaardighede jy het, hoe minder waarskynlik is dit dat jy vervangbaar gaan raak.
• • Tyd- en kostedoeltreffend – Kortkursusse is bekostigbaar en verg minder tyd as voltydse studie.

Hoe begin jy?

Dit is maklik! Indien jy nog nie ʼn profiel op Solidariteit se aanlyn platform geregistreer het nie, doen dit sommer nou: https://aanlyn.solidariteit.co.za/registreer. Dit is jou eerste stap na ʼn beter en sterker toekoms.

As ʼn jong kantoorpraktisyn is dit vir my ook belangrik om myself te bemagtig, te groei en my vaardighede te ontwikkel. Daarom sit ek vanjaar my studiereis by Akademia voort!

Indien jy graag verder wil studeer en kans sien vir ʼn tersiêre kwalifikasie, is jy welkom om Solidariteit se opleidingsinstellings te oorweeg.

Akademia is ʼn Christelike en onafhanklike hoëronderwysinstelling in die klassieke tradisie van universiteitswese. Dié instelling het vanuit en vir Afrikaanse taal- en kultuurgemeenskappe ontstaan. Akademia streef daarna om ʼn akademiese tuiste te bied waar die denke én die hart gevorm word met die oog op ʼn vrye toekoms.

Sol-Tech is ʼn private beroepsopleidingskollege wat jong mense uitstekend vir hul toekoms voorberei, en fokus op IT- en ambaggerigte kwalifikasies.

Solidariteit bied ʼn gesubsidieerde opleidingsvoordeel aan lede by die volgende instellings: Akademia, Sol-Tech, Bo-Karoo Opleiding en die Solidariteit Helpende Hand Opleidingsinstituut. Om hierdie rede hoef finansies nie ʼn bekommernis of struikelblok te wees wanneer jy wil groei en jouself bemagtig nie.

Neem jou toekoms in jou hande!

Die toekoms behoort aan dié wat leer

Onthou, jou werk is veel meer as net administratiewe take. Jy is die spilpunt in die sukses van jou onderneming. Deur jouself met nuwe kennis en vaardighede te bemagtig, verseker jy nie net jou eie vooruitgang nie, maar dra jy ook by tot die groei en sukses van jou werkplek.

Jy verdien dit om te groei en jouself uit te daag. Bowenal verdien jy om trots te wees op wat jy doen. Moenie wag vir geleenthede nie – skep dit self. Begin vandag. Jou toekoms begin hier!

Die Solidariteit Kantoorpraktisynsnetwerk is hier om jou by te staan in jou beroep en op jou lewensreis! Indien jy enige navrae het, stuur gerus ʼn e-pos aan kantoor@solidariteit.co.za.