Maak jou sogenaamde “swakpunte” jou superkrag!

“Jy is te afhanklik van jou selfoon!” “Jy is te emosioneel!” Die wêreld bestempel soms ʼn eienskap as ʼn “swakpunt”, maar jy kan hierdie kritiek omskakel in die geheime wapen wat jou sukses verseker…

Deur Karen Waldeck

“Elke keer as iemand sê ek is té afhanklik van tegnologie, voel ek bietjie skuldig… totdat ek besef dis juis hierdie vaardigheid wat my help om aan te pas, vinniger te leer en met mense wêreldwyd te skakel.” Klink dit soos iets wat jy al gehoor het – of dalk self gesê het? Wel, die goeie nuus is: Ons leef nou in ʼn era waarin jy jou sogenaamde swakpunte in jou sterkste bate kan omskep.

Kom ons wees eerlik – almal van ons het al kritiek gekry wat eintlik nie heeltemal onvanpas is nie. “Jy is te sensitief.” “Jy droom te groot.” “Jy is altyd op jou foon.” Maar wat as jy dié opmerkings kan gebruik as groeigeleenthede eerder as struikelblokke?

Skakel kritiek om in kreatiewe groei

Kom ons begin met die klassieke voorbeeld: “Jy is te afhanklik van tegnologie.” Ja, dalk is jy die persoon wat eerder met ʼn aanlyn kalender as ʼn papierkalender werk, of wat eerder vir ChatGPT vra as om iemand persoonlik te bel. Maar in plaas daarvan om dit as ʼn swakpunt te sien, kan jy dit as ʼn aanduiding gebruik dat jy aanpasbaar is. Jy is waarskynlik ook gemaklik met verandering – iets wat baie mense sukkel om onder die knie te kry.

Gebruik hierdie eienskap om byvoorbeeld nuwe digitale vaardighede aan te leer soos aanlyn samewerkingshulpmiddels, data-analise, of selfs die toepassing van kunsmatige intelligensie – iets wat jy hier op Solidariteit se aanlyn leerplatform kan verken. Dit kan jou nie net help om in jou huidige werk beter te presteer nie, maar jou ook bemagtig vir loopbane van die toekoms.

Bou jou “mensvaardighede” – een gesprek op ’n slag

Tegniek is belangrik, maar menslike kontak bly koning. Dus, as mense sê jy is te afhanklik van tegnologie, gebruik dit as ʼn teken om doelbewus jou interpersoonlike vaardighede te slyp. Miskien is dit tyd om weer saam met ʼn kollega te gaan koffie drink eerder as om ʼn e-pos te stuur, of om jou luistervaardighede in vergaderings te verbeter – sonder om op jou selfoon te loer!

Mensvaardighede soos empatie, kommunikasie en leierskap word al hoe meer gesog in ʼn wêreld waar tegnologie die reëls herskryf

Jou “swakpunt” is dalk net die begin van iets briljant

Hier is ’n paar ander voorbeelde van kritiek wat jy dalk al gehoor het – en hoe jy dit kan herformuleer in ’n positiewe, groei-gefokusde perspektief:

• “Jy droom te groot.” – Jy het visie! Leer om jou drome in stappe op te breek en bou aan ʼn plan. Begin dalk met doelgerigte loopbaanbeplanning en werk sistematies na daardie droom toe. Of skakel met mense wat jou drome in planne kan omskep – jy hoef nie die hele plan alleen aan te pak nie.
• “Jy is te emosioneel.” – Jy het hoë emosionele intelligensie! Ontwikkel dit verder en gebruik dit om ander beter te verstaan en te lei.
• “Jy werk te stadig.” – Jy is waarskynlik akkuraat en detailgeoriënteerd. In sommige beroepe is dit ʼn goudmyn – dink aan argitektuur, data-analise of gehaltebeheer.
• “Jy vra te veel vrae.” – Jy is nuuskierig en leergierig. Dit is ʼn sleutel tot innovasie! Begin dalk met ʼn kursus of mentorprogram en moedig ander aan om ook vrae te vra.

Dit is jou jaar om jou unieke kombinasie van eienskappe te omhels.

In plaas daarvan om jouself elke keer te probeer “regmaak” op grond van ander se persepsies, gebruik hierdie kritiek om jou eie pad van groei te loop – een wat eg en betekenisvol is, en wat jou as geheelmens ontwikkel.

Vra jouself: Wat is my natuurlike neigings, en hoe kan ek dit tot my unieke voordeel omskep? As jy graag nuwe dinge leer, span dit in om jou aanlyn leerprofiel uit te bou. As jy geneig is om ander te help, soek geleenthede vir mentorskap. En as jy soms oorweldig voel deur die wêreld se verwagtinge – onthou, jy hoef nie alles reg te hê nie. Jy moet net aanhou beweeg.

Wenke om jou “swakpunte” in jou sterkste bate te omskep:

1. 1. Herken dit – skryf neer wat mense dikwels van jou sê.
2. 2. Hersien dit – vra: Is dit regtig negatief, of net anders?
3. 3. Herformuleer dit – soek die waarde of voordeel daarin.
4. 4. Ontwikkel dit verder – soek ʼn kursus, mentor of geleentheid.
5. 5. Gebruik dit doelbewus – bou ʼn storie daaroor, en gebruik dit in werksgeleenthede of persoonlike groei.

Onthou: Elke sogenaamde swakpunt het ʼn teenoorgestelde krag wat net wag om ontgin te word. Soms is dit juis dié dinge wat ander as “anders” sien, wat jou onmisbaar maak in ʼn vinnig veranderende wêreld.

Solidariteit is jou getroue loopbaanvenoot. Die pad na sukses is hoegenaamd nie reguit of gelyk nie, maar jy kan hierdie pad stap met Solidariteit aan jou sy, gereed om in te tree wanneer jy dit nodig het. Skep jou gratis profiel en sluit aan by ʼn aanlyn wêreld van werk wat werklik omgee.