NGV: Baie gevaarlik as dit ooit ten volle geïmplementeer word

Deur dr. Eugene Brink

Die parlement het toestemming gegee dat die Nasionale Gesondheidsversekering- (NGV-)skema kan voortgaan, maar daar is nog verskeie hindernisse wat oorkom moet word voordat dit wet kan word.

Daarbenewens moet dit deur die Nasionale Raad van Provinsies goedgekeur word en aan (verdere) openbare verhore onderwerp word. Eers dan kan president Cyril Ramaphosa dit as wet onderteken. Hierdie proses sal verseker deur verskeie rolspelers met litigasie ontwrig word.

Hierdie wetgewende proses is egter slegs die maklike en die belangrikste aspek van die instelling van so ʼn stelsel. Om dit te laat werk, is die veeleisendste en kritieke deel. En dit is waar die stelsel gaan vasval, om dit liggies te stel.

Belastingbetalers en veral diegene wat van die privaat gesondheidsorgsektor gebruik maak, kan (vir die huidige) ʼn sug van verligting slaak, want as hierdie skema ten volle geïmplementeer word, kan dit niks minder nie as die vernietiging van Suid-Afrika en sy ekonomie beteken. Kom ons kyk na enkele van die gevolge van hierdie voorgenome program.

Volgens Bloom Financial Services sal NGV omvattende siekefondse tot niet maak. “As dit eers geïmplementeer is, sal mediese skemas geen gesondheidsdienste mag aanbied wat reeds deur die NGV aangebied word nie. Mediese skemas sal jou net ekstra dienste kan bied wat nie deur die NGV gedek word nie.”

In kort, alle gesondheidsorgfondse sal gesentraliseer (eintlik genasionaliseer) word in ʼn enkele staatsbeheerde fonds. Gedagtig aan wat die regering as die kurator van belastinggeld deur blatante korrupsie en wanaanwending aangevang het, is dit ʼn ysingwekkende gedagte.

Discovery bied verdere kritiek in hierdie opsig. “Ons streng standpunt is dat om die rol van mediese skemas te beperk teenproduktief sal wees vir die NGV omdat daar doodeenvoudig onvoldoende hulpbronne is om in die behoeftes van alle Suid-Afrikaners te voorsien. Om mense te beperk as hulle die medieseskemadekking van hul keuse wil koop, sal die gesondheidsorg wat hulle verwag en eis ernstig kortwiek. Dit hou die risiko in van die aftakeling van sentiment en dat die land van uiters noodsaaklike vaardighede gestroop word, en dit het ʼn negatiewe impak op plaaslike en internasionale beleggersentiment en sakevertroue.”

Hoera! Geen duur mediese skems meer nie en gratis sorg vir almal. Niks kan verder van die waarheid wees nie. Wyle PJ O’Rourke het eenkeer gegrap dat as jy dink gesondheidsorg is nou duur, moet jy wag totdat dit gratis is. Die regering sal die NGV gebruik as ʼn voorwendsel om verdere belastings op te lê, en dit moet nog vasgestel word. So, wees versigtig met waartoe jy instem en wat jy vier. Elke belastingbetaler sou vermoedelik baie meer aan belasting kon betaal, net om vasgevang te word in nog ʼn ontsaglike en onbekwame burokrasie bloot om jou plaaslike algemene praktisyn (AP) te besoek. En jou plaaslike AP, wat ook aan die giere van hierdie stelsel onderworpe is, sal nie deur die staat betaal word nie (net soos ander diensverskaffers wat met die regering sake doen) en besluit om te emigreer.

Prof Nicola Theron en dr. Paula Armstrong van FTI Consulting het onlangs geskryf: “Om daarop aan te dring dat die enigste pad na universele gesondheidsorg (UGS) deur ʼn enkele poel fondse is wat deur die regering bestuur word, en die erodering van die rol van mediese skemas as kopers van mediese dienste, sal waarskynlik bydra tot die ondergang van ʼn sterk en goed funksionerende privaat gesondheidsorgsektor. Dit verklein die verbruiker se keuses, erodeer mededinging en kan selfs lei na dieselfde uitkomste as ander onlangse voorbeelde van ondernemings in staatsbesit en fondse.”

Solidariteit is heftig gekant teen die NGV en ten gunste van ʼn markbenadering met ʼn keuse vir privaat diensverskaffers en die publiek, en ʼn verbeterde openbare gesondheidsorgstelsel. NGV sal Suid-Afrika ruïneer en Solidariteit berei voor vir ʼn groot hofstryd om seker te maak dat die gesondheidsorgsektor vry, veilig en voorspoedig is.

Lees hier meer oor Solidariteit se stryd teen die NGV. Lees meer hier oor die kostes van die NGV of hier vir medici se kommer oor die NGV.