Solidariteit bring hulde aan leierskap, diens en ’n nuwe hoofstuk

Robin-Lee Maré

Solidariteit wens al die lede van die Metaal en Ingenieurswese (M&I) se bedryfsraad geluk met die suksesvolle afhandeling van die verkiesingsproses op 16 September 2026, asook die verkiesing van die nuwe Nasionale Raad-lede.

Die proses vorm ’n belangrike deel van Solidariteit se strukture en weerspieël die betrokkenheid, verantwoordelikheid en gewilligheid van lede wat bereid is om ’n verskil te maak.

“Die suksesvolle verloop van die bedryfsraad wys opnuut hoeveel waarde daar in aktiewe lede en sterk verteenwoordiging lê. Ons is dankbaar vir elke lid wat bereid is om verantwoordelikheid te aanvaar en hul kollegas binne Solidariteit se strukture te verteenwoordig,” sê Willie Venter, adjunkhoofsekretaris van Solidariteit.

’n Spesiale woord van dank aan Blackie Swarts

Met hierdie belangrike oomblik in Solidariteit se strukture word daar ook stilgestaan by die diens en nalatenskap van Blackie Swarts, wat in 2025 as president van Solidariteit verkies is en nou sy termyn afsluit.

Blackie se betrokkenheid by Solidariteit strek oor vier dekades. Sy dienspad het reeds in 1986 by die destydse Mynwerkersunie begin, waar hy aangesluit en onmiddellik as verteenwoordiger begin dien het.

Reeds vroeg in sy vakbondloopbaan het Blackie ’n belangrike rol gespeel in die proses wat uiteindelik tot erkenning by Cape Gate gelei het. Hy dien ook sedert 1986 as voorsitter van die Cape Gate-verteenwoordigerskomitee.

Sy dienspad het hom daarna deur verskeie strukture van Solidariteit geneem. In 1996 is hy tot die Hoofraad verkies, waar hy oor ’n tydperk van 25 jaar gedien het.

Sedert 2006 het Blackie Solidariteit vir ’n tydperk van tien jaar op die raad van merSETA verteenwoordig. Hy is in 2010 weer tot die Hoofraad verkies en in 2015 as visepresident van Solidariteit aangewys. Sy jarelange diens het uiteindelik in 2025 tot sy verkiesing as president van Solidariteit gelei.

Deur dié verskillende rolle heen het Blackie ’n kardinale rol in Solidariteit en sy strukture vertolk. Sy betrokkenheid het veel verder as posisies en titels gestrek, en is gekenmerk deur diens, verantwoordelikheid en die uitleef van Solidariteit se visie.

As voorsitter van Solidariteit se Hoofraad het Blackie op strategiese vlak saam met Solidariteit se bestuurspan gewerk. Hy het ook as voorsitter van die Hoofraad se subkomitees gedien, waar aanbevelings en terugvoer aan die Hoofraad gelewer is.

Een van sy belangrikste verantwoordelikhede was om toe te sien dat mosies wat tydens Solidariteit se Nasionale Raad ingedien is, die nodige aandag geniet en, waar moontlik, geïmplementeer word.

“Blackie se loopbaan binne Solidariteit getuig van iemand wat bereid is om oor dekades heen sy tyd, kennis en ervaring tot diens van ander aan te wend. Sy bydrae lê nie net in die ampte wat hy beklee het nie, maar ook in die rol wat hy gespeel het om Solidariteit se strukture uit te bou en te versterk,” sê Venter.

Dankie vir ’n lewe van diens

Solidariteit bedank Blackie vir sy jarelange diens, sy bereidwilligheid om verantwoordelikheid te aanvaar en sy volgehoue betrokkenheid by die beweging se strukture.

Sy diens aan Solidariteit het oor dekades heen gestrek en vorm ’n belangrike deel van die beweging se verhaal. Hoewel hierdie hoofstuk nou afsluit, bly die waardes van diens, betrokkenheid en verantwoordelikheid wat hy uitgeleef het, deel van Solidariteit se nalatenskap.

“Ons neem met groot waardering afskeid van Blackie in hierdie besondere rol. Vier dekades se diens is ’n merkwaardige mylpaal en ons bedank hom vir die bydrae wat hy tot Solidariteit en sy lede gelewer het. Ons wens hom en sy geliefdes alle voorspoed toe met die volgende hoofstuk,” sê Venter.

’n Nuwe hoofstuk vir Solidariteit

Die suksesvolle afhandeling van die M&I-bedryfsraad op 16 September 2026, die verkiesing van nuwe Nasionale Raad-lede en Blackie Swarts se uittrede as president verteenwoordig ’n nuwe hoofstuk vir Solidariteit.

Solidariteit wens die lede van die M&I-bedryfsraad geluk met die suksesvolle afhandeling van die proses en bedank hulle vir hul bereidwilligheid om te dien.

Die nuut verkose Nasionale Raad-lede word eweneens gelukgewens met hul verkiesing en die verantwoordelikheid wat hulle voortaan binne Solidariteit se strukture sal dra.

“Ons sien uit na die nuwe hoofstuk en vertrou die nuwe Nasionale Raad-lede sal met wysheid, verantwoordelikheid en toewyding hul rol vervul. Sterk strukture word gebou deur mense wat bereid is om betrokke te raak en diensbaar te wees,” sluit Venter af.

Solidariteit gaan voort om te veg, te bou en te beskerm.