Solidariteit stel vyf toetse vir enige reddingsplan vir Denel PMP

Solidariteit sê enige voorstel om Denel Pretoria Metal Pressings (PMP) te herstel moet aan vyf praktiese toetse voldoen voordat dit as geloofwaardig en volhoubaar beskou kan word.

Dié standpunt volg op onlangse openbare debat en verskeie artikels oor die toekoms van Suid-Afrika se verdedigingsvermoë, die finansiële uitdagings van die Suid-Afrikaanse Nasionale Weermag en voorstelle om PMP deur nuwe beleggingsinisiatiewe te herleef.

Volgens Derek Mans, sektorkoördineerder by Solidariteit, gaan die debat oor PMP se toekoms oor veel meer as net finansiering, beleggings of vennootskappe.

“PMP se toekoms gaan uiteindelik oor mense. Soewereine vermoë berus nie slegs op geboue, masjinerie of infrastruktuur nie, maar veral op die mense wat weet hoe om dit veilig en doeltreffend te bedryf. Denel PMP is ʼn praktiese voorbeeld van waarom hierdie werklikheid nie geïgnoreer kan word nie,” sê hy.

PMP bly een van Suid-Afrika se belangrikste verdedigingsvervaardigingsaanlegte. Die aanleg se voortbestaan raak nie net sy werknemers nie, maar ook die Suid-Afrikaanse Nasionale Weermag, die Suid-Afrikaanse Polisiediens, die plaaslike verdedigingsbedryf en die land se breër strategiese belange.

Solidariteit ondersteun ernstige pogings om PMP weer op ʼn stabiele, veilige en volhoubare grondslag te plaas. Die vakbond steun geloofwaardige beleggings, praktiese vennootskappe en bedryfsmodelle wat werkgeleenthede beskerm, skaars vaardighede behou en produksie herstel.

“Die vraag is nie bloot of PMP gered kan word nie. Die werklike vraag is wie die plan gaan uitvoer, hoe kritieke vaardighede behou gaan word en hoe nóg ʼn mislukte omkeerstrategie voorkom gaan word,” sê Mans.

Werknemers by Denel het reeds jare van onsekerheid, bestuursmislukkings, bedryfsontwrigting en salarisprobleme beleef. Talle hoogs geskoolde werknemers het reeds die organisasie verlaat, terwyl dié wat oorgebly het steeds oor die kundigheid beskik waarop enige toekomstige herstel afhanklik sal wees.

Om dié rede sal Solidariteit enige reddingsplan, huurooreenkoms, beleggingsvoorstel, publiek-private vennootskap of strategiese samewerking aan die volgende vyf toetse meet:

1. Salarisstabiliteit

Werknemers moet betyds betaal word. Enige geloofwaardige voorstel moet duidelik uiteensit hoe salarisse gefinansier gaan word en hoe verdere onsekerheid vir werknemers voorkom gaan word.

2. Beskerming van werknemers en behoud van vaardighede

PMP se grootste bate is sy mense. Enige plan moet verduidelik hoe kritieke ambagslui, ingenieurs, tegnici, operateurs, inspekteurs, programbestuurders en veiligheidskundiges behou gaan word. Dit moet ook voorsiening maak vir vaardigheidsontwikkeling, vakleerlingskappe en kennisoordrag.

3. Veilige produksie

PMP funksioneer in ʼn hoogs gespesialiseerde en hoërisikovervaardigingsomgewing. Enige voorstel moet aandui hoe veiligheidstandaarde gehandhaaf, toerusting onderhou en operasionele risiko’s bestuur gaan word.

4. Goeie bestuur en aanspreeklikheid

Vertroue in enige herstelproses vereis deursigtige bestuursreëlings, duidelike besluitnemingsprosesse, effektiewe verslagdoening en aanspreeklikheid wanneer mislukkings voorkom.

5. Meetbare mylpale en resultate

Herstel moet sigbaar wees. Voorstelle moet realistiese tydlyne, produksieteikens, verantwoordelike besluitnemers en gereelde vorderingsverslae bevat sodat alle belanghebbendes die proses objektief kan beoordeel.

Mans sê Suid-Afrika se fiskale uitdagings noodsaak praktiese oplossings, maar enige oplossing moet die land se strategiese belange beskerm.

“Verantwoordelike publiek-private vennootskappe en strategiese samewerkings kan belegging, tegnologie en marktoegang ontsluit. Die beskerming van Suid-Afrika se soewereine belange, kritieke vaardighede en institusionele kennis moet egter altyd voorop staan,” sê hy.

Volgens Mans berus strategiese vermoë uiteindelik by die mense wat oor dekades kennis en ervaring opgebou het.

“Fasiliteite kan herstel word. Masjinerie kan vervang word. Finansiële probleme kan opgelos word. Wat nie maklik vervang kan word nie, is die opgeboude kennis en ervaring van werknemers wat die aanleg, prosesse, produkte en veiligheidsvereistes verstaan. Wanneer daardie kennis verlore gaan, raak herstel baie moeiliker en soms selfs onmoontlik,” sê Mans.

Solidariteit doen daarom ʼn beroep op Denel se direksie, die departement van verdediging, die Parlement, die Nasionale Tesourie en enige potensiële belegger of strategiese vennoot om werknemers sentraal tot die herstelproses te plaas.

“PMP moet weer ʼn funksionerende fabriek word, nie bloot ʼn strategiese bate op papier nie. Vertroue word nie deur aankondigings herstel nie, maar deur vaardige mense, veilige produksie, stabiele werk, verantwoordbare leierskap en meetbare resultate,” sluit Mans af.