Solidariteit verwelkom Denel-loonverhoging vir vasbyters, maar hef aan lê voor

Solidariteit verwelkom die besluit van Denel oor ’n nuwe loonooreenkoms wat aan werknemers oor die hele linie ’n verhoging van 5,5% terugwerkend vanaf 1 April 2026 toestaan.

Volgens Solidariteit is dit ’n betekenisvolle stap om broodnodige erkenning aan werknemers te gee wat oor jare heen groot onsekerheid, uitdagings en opofferings by Denel moes verduur.

Volgens Derek Mans, koördineerder vir lugvaart en verdediging by Solidariteit, stuur die ooreenkoms ’n belangrike boodskap aan werknemers wat onder moeilike omstandighede aangehou het om hulle werk te doen en die wapenvervaardiger staande te probeer hou.

“Denel staar steeds ernstige finansiële en bestuursuitdagings in die gesig, en ons besef daar lê nog ’n lang pad voor. Hierdie ooreenkoms is egter ’n belangrike stap om werknemers se waardigheid te herstel en erkenning te gee aan mense wat, ondanks jare van onsekerheid, lojaal gebly het en steeds hul werk doen,” sê Mans.

Solidariteit glo verder die ooreenkoms beklemtoon die vakbond se bereidwilligheid om op ’n konstruktiewe wyse saam met Denel as werkgewer te werk, en veral sy vasberadenheid om sy lede se belang as werknemers te beskerm en uit te bou.

“Ons benadering bly onveranderd een van samewerking waar dit moontlik is, mits dit ons lede se belange beskerm. Terselfdertyd wil ons graag realistiese en werkbare oplossings vir Denel se toekoms ondersteun. 

“Ons is versigtig optimisties, maar daar moet steeds praktiese en uitvoerbare besluite oor die onderneming se koers en toekoms geneem word,” sê Mans.

Solidariteit glo verder daar is steeds tekens dat afdelings van Denel sukses kan behaal. Een afdeling het onlangs sterk finansiële prestasie getoon, met ex gratia-bonusse en salarisaanpassings wat selfs teruggedateer is. 

Volgens Solidariteit wys dit hoe daar eilande van uitnemendheid steeds binne die onderneming bestaan.

Verder verwelkom Solidariteit die hernieude belangstelling van Omusha Firearms om in Denel se PMP-afdeling te belê.

“Hierdie ontwikkelings skep hoop en ruimte vir konstruktiewe en toekomsgerigte gesprekke oor Denel. Suid-Afrika het steeds sy strategies noodsaaklike verdedigingsektor nodig, maar dit vereis verantwoordelike bestuur, geloofwaardige vennootskappe en moeilike besluite,” sê Mans.

Mans sê Solidariteit erken dat groot werk ongetwyfeld voorlê en glo kwessies soos wanbestuur en die ernstige gevolge daarvan moet met selfs groter dringendheid aangespreek word. 

“Tog is hierdie loonooreenkoms ’n positiewe stap in die regte rigting en iets wat tot positiewe momentum vir stabiliteit bydra,” sê Mans.