Student, raak jou finansies baas!

Deur Liza Joubert

Om jou eie finansies te bestuur klink wonderlik, totdat jy dit moet begin doen. Dit kan uitdagend wees, veral as jy dit vir die eerste keer op jou eie moet doen. Tog is dit noodsaaklik om ʼn goeie grondslag te lê en jou finansies só te bestuur dat jy jou akademiese sukses kan ondersteun en toekomstige skuld kan vermy. Deur ʼn begroting op te stel en effektief te spaar, kan jy beheer van jou finansies neem en gemoedsrus geniet terwyl jy op jou studie fokus.

Stel ʼn begroting op

1. Bepaal jou inkomste(s) en uitgawes

Die eerste stap om jou finansies te bestuur, is om jou inkomste(s) en uitgawes te bepaal. Jou inkomste kan bestaan uit studielenings, beurse, ʼn deeltydse werk of bydraes van jou ouers af. Lys al jou bronne van inkomste en bereken dan jou maandelikse inkomste.

Daarna moet jy jou maandelikse uitgawes identifiseer. Dit sluit in noodsaaklike kostes soos klasgeld, verblyf, vervoer, kos, skoonmaakmiddels en boeke, asook nie-noodsaaklike uitgawes soos vermaak, uitgaan en subskripsies. Deur al jou uitgawes te lys, gaan jy ʼn duidelike prentjie kry van jou finansiële situasie.

2. Stel ʼn realistiese begroting op

Sodra jy ʼn oorsig het van jou inkomste(s) en uitgawes, kan jy ʼn realistiese begroting opstel. Begin deur jou uitgawes op te deel in noodsaaklikhede en dinge wat minder noodsaaklik is. Jou eerste prioriteit moet wees om al jou noodsaaklike uitgawes met jou inkomste(s) te dek. Kyk dan of jy enige nie-noodsaaklike uitgawes kan verminder of elimineer om binne jou begroting te bly.

Dit is belangrik om ʼn realistiese begroting op te stel wat jy kan volhou. Moenie vergeet om ʼn gedeelte van jou begroting opsy te sit vir noodsituasies of onverwagte uitgawes nie.

3. Hou jou uitgawes dop

Dit is een ding om ʼn begroting op te stel, maar ʼn ander om daarby te hou. Gebruik ʼn app soos Buddy of selfs ʼn eenvoudige Excel-spreitabel om ʼn ogie oor jou uitgawes te hou. Hierdie gereedskap help jou om tred te hou met waarheen jou geld gaan en om seker te maak dat jy binne jou begroting bly.

Wenke om effektief te spaar

1. Skep ʼn spaarplan

Selfs al is jy ʼn student met ʼn beperkte inkomste, is dit steeds moontlik en belangrik om te spaar. Stel ʼn spaarplan op deur elke maand ʼn vaste bedrag opsy te sit, selfs al is dit ʼn klein bedrag. Dit kan in ʼn aparte spaarrekening geplaas word, wat nie maklik toeganklik is nie, sodat jy nie in die versoeking kom om dit te gebruik nie.

2. Maak gebruik van studentekortings

Talle besighede en dienste bied afslag aan studente. Maak gebruik van hierdie studentekortings wanneer jy aankope doen of dienste gebruik. Dit kan jou help om aansienlike besparings op uitgawes soos klere, elektronika en selfs vermaak te kry.

3. Vermy kredietkaartskuld

Kredietkaartskuld kan vinnig ophoop en dit kan jare neem om dit af te betaal. As jy ʼn kredietkaart het, gebruik dit verantwoordelik en betaal die volle saldo elke maand af om rentekoste te vermy. Dit is beter om kontant of ʼn debietkaart vir jou aankope te gebruik sodat jy net spandeer wat jy het.

4. Stel haalbare finansiële doelwitte

Stel haalbare kort- en langtermyn finansiële doelwitte om jou gemotiveerd te hou. Dit kan iets wees soos om genoeg te spaar vir ʼn vakansie, om jou studieleningskuld te verminder, of om ʼn noodfonds op te bou. Doelwitte gee jou iets om na te streef en help jou om dissipline te handhaaf in jou spaargedrag.

Dis maklik om in die strik van skuld te trap en dan is dit moeilik om jouself daaruit uit te kry. Begin van jou studentedae af om positiewe finansiële gewoontes te vestig. Jy sal nie ʼn dag spyt wees nie. Op Solidariteit se Studentelewe-groep deel ons graag wenke oor finansies, studies, werk en welstand. Skep jou gratis profiel op Solidariteit en raak deel van hierdie studentegemeenskap en jy sal lag-lag jou studies én finansies baasraak!