Van spanning tot samewerking: Hoe die ANC bande met Amerika sou kon herstel

Spanning tussen die ANC en Amerika loop tans om verstaanbare redes hoog. Die kanse is uiters skraal dat hierdie verhouding herstel kan word, maar as die ANC hierdie belangrike diplomatieke verhoudinge ten bate van Suid-Afrika sou wou behou, sal hulle daadwerklik en vinnig moet optree.

Deur Leré Nel

Die verhouding tussen die ANC en die Verenigde State verkeer die afgelope tyd onder hoë druk – veral ná ambassadeur Ebrahim Rasool se uitlatings op die Mapungubwe Institute se beraad oor buitelandse beleid.

Om bande te herstel, sal die ANC ʼn aantal sleutelstappe moet oorweeg. Dit lyk egter of ideologiese verkramptheid die ANC keer om enige van hierdie nodige stappe te neem. Jaco Kleynhans lig ʼn paar stappe uit wat die ANC sou kon neem om die verhouding tussen Suid-Afrika en die VSA te herstel:

• Erkenning van foute: Die ANC moet ʼn amptelike verskoning aan die Trump-administrasie rig vir uitlatings soos dié van Rasool. Die ANC moet ook skuld erken vir die agteruitgang van verhoudinge met Amerika.
• Die aanstel van ʼn nuwe Suid-Afrikaanse ambassadeur in Washington DC: Hierdie nuwe ambassadeur moet verkieslik uit ʼn ander party kom, en moet geen geskiedenis van anti-Amerikaanse uitsprake hê nie.
• ʼn Nuwe ooreenkoms oor die ANC se buitelandse optrede: Die ANC moet onderneem om nie teen Amerikaanse belange op te tree nie en sy buitelandse betrokkenheid grootliks tot die Afrika-vasteland te beperk. Suid-Afrika se inmenging in konflikte soos dié in die Midde-Ooste moet ook summier beperk word.
• ʼn Hersiening van binnelandse beleid: Vryemarkbeginsels en eiendomsreg, asook die reg van minderhede in Suid-Afrika moet beskerm word en ontwikkeling moet kan plaasvind, sonder om deur diskriminerende wetgewing en aanvalle teen minderhede soos die Afrikaner gekniehalter te word.

Deur hierdie stappe te volg, sal die ANC kan begin om te herbou aan verhoudinge tussen Suid-Afrika en die VSA. Dit lyk egter nie of hierdie helder denke tans in ANC-kringe seëvier nie.

Vir meer inligting, klik hier!