Van verwagting tot werklikheid: My internskapverhaal

Wat gebeur regtig tydens ʼn internskap? In hierdie eerlike blog vertel ʼn intern hoe verwagtinge dikwels met die werklikheid bots – en hoe waardevolle vaardighede soos inisiatief, aanpasbaarheid en selfvertroue juis danksy daardie uitdagings ontwikkel word. Lees meer oor Armand se internskapervaring en waarom só ʼn geleentheid onmisbaar vir enige student is.

Deur Armand Snyman

Toe ek my internskap by Solidariteit begin het, het ek vol opgewondenheid ingestap – en natuurlik met ʼn kop vol verwagtinge. Ek het gewonder of ek net gaan waarneem, of ek werklik iets betekenisvol sou doen, en of iemand my voortdurend sou lei, soos ʼn dosent in die klas. Ek het selfs gewonder of ek nie dalk net koffie gaan maak en lêers rondskuif nie. Jy het dalk self al soortgelyke gedagtes gehad.

Maar ek het gou besef dat ʼn internskap nie iets is wat soos ʼn klaargemaakte maaltyd aan jou voorgesit word nie. Dis iets waarin jy self inspring – en hoeveel jy daaruit kry, hang af van jou houding, jou nuuskierigheid en jou bereidwilligheid om te leer. En die werklikheid? Dis soveel meer opwindend – en soms meer uitdagend – as wat ek ooit kon verwag.

Ek het nie net voor ʼn rekenaar gesit en vir opdragte gewag nie. Ek het regte werk gedoen: navorsing onderneem, idees ontwikkel, e-posse aan lede gestuur, en selfs inhoud vir toekomstige projekte beplan. Ek moes vrae vra, my eie werk bestuur en leer hoe om my plek binne ʼn professionele span vol te staan. En ja, daar was oomblikke van onsekerheid, maar dit was juis in daardie oomblikke waar ek die meeste gegroei het.

Ek het geleer dat jy nie altyd gaan weet wat om te doen nie – en dis heeltemal reg so. Jy gaan foute maak. Jy gaan buite jou gemaksone beweeg. Jy gaan soms dink jy’s nie gereed nie. Maar elke taak wat jy aanpak, elke suksesvolle e-pos wat jy stuur, elke klein stukkie selfvertroue wat groei – dis alles boustene vir jou toekoms.

Dis nie altyd maklik nie, maar dis absoluut die moeite werd.

Ek het ook besef dat ek nie hoef te wag vir iemand om vir my te sê wat om te doen nie. As ek iets sien wat gedoen moet word, doen ek dit. As ek onseker is, vra ek. As ek ʼn goeie idee het, deel ek dit – want inisiatief en eerlike kommunikasie is belangriker as om altyd die regte antwoord te hê.

Wat ek vir enige student wil sê, is dit: moenie wag tot ná jou studies nie – doen ʼn internskap. Kry daardie blootstelling. Leer hoe dit regtig in die werkplek lyk. Jy gaan soveel oor jouself ontdek: jou sterkpunte, jou uitdagings, wat jou motiveer, en hoe jy deel van ʼn span vorm. En die beste van alles? Jy gaan besef dat jy wel iets het om by te dra, selfs al leer jy nog.

ʼn Internskap is nie net ʼn inskrywing op jou lewensloop of CV nie, dis ʼn geleentheid om jouself te ontdek en in ʼn werklike beroepsomgewing te ontwikkel. Dit bring groei, insig, selfvertroue en soms ook die besef dat jy sterker is as wat jy dink.

Die werklikheid van ʼn internskap lyk dalk nie soos jy dit in jou kop voorstel nie, maar dis juis daardie werklikheid wat jou voorberei vir die toekoms. En glo my, as jy terugkyk, gaan jy dankbaar wees dat jy die kans gewaag het.