Voorkom uitbranding in tegnologie: ʼn Persoonlike oordenking

In hierdie meningstuk deel Marius Vorster sy insigte oor die uitdagings van ʼn veeleisende loopbaan in die tegnologiebedryf. Hy wys daarop dat uitbranding dikwels spruit uit ʼn wanbalans tussen inspanning en herstel eerder as net té veel werk. Hy bied ʼn realistiese pad na volhoubare sukses. Lees hier meer van Marius se persoonlike ervaring oor hoe jy balans in ʼn veeleisende IT-loopbaan kan vind sonder om jou gesin of welstand daarvoor op te offer.

Deur Marius Vorster

Daar is baie veeleisende loopbane, maar tegnologie bied ’n unieke soort uitdaging. Oor verskeie rolle heen – van ontwikkeling tot data, operasies tot produk – is hoë druk, lang ure en laat nagte die universele geldeenheid.

Ek het oor die spektrum gewerk: rekenaarwetenskap in privaat skole aangebied, netwerke geïnstalleer, munisipale webwerwe in België gebou en internasionale finansiële projekte in Singapoer afgelewer. En ten spyte van die titel van hierdie stuk het ek al meer kere uitgebrand as wat ek wil erken. Te gereeld het ek gesien hoe talentvolle mense die sektor verlaat ná uitputtende tydperke, gelok deur minder veeleisende loopbane.

Voordat ek raad gee, laat ek eerlik wees: Hierdie rolle is nie maklik nie. Jy moet hard werk. Jy moet nuuskierig bly, bybly met vinnige veranderinge en aanpasbaar wees. Jy het deursettingsvermoë en veerkragtigheid nodig om deur te druk – selfs wanneer dit meer is as wat redelikerwys van jou verwag kan word. Die beloning is egter werklik: invloed, impak en die geleentheid om ’n ware agent van verandering te wees.

Hier is wat ek geleer het: Uitbranding gaan selde net oor té veel werk. Dit gaan oor ’n wanbalans – jou energie raak op en jy vul dit nie weer aan nie. En hier is die kinkel: Die oplossing is nie net rus nie. Dis om meer te doen – meer van wat jou energie gee.

Sport, stokperdjies, sosiale interaksie, persoonlike projekte. Dit is nie afleidings nie – dis brandstof. Ja, jy kan dalk iets binne jou werkure aanpas, maar dikwels is dit hoe jy die “krummels van tyd” buite werktyd gebruik wat die grootste verskil maak.

Slaap is noodsaaklik. Kry jou 7–8 ure. Maar as jy jou energie proaktief bestuur, hoef jy nie oor ʼn naweek ineen te stort of van vakansie tot vakansie te leef nie.

Belangrike onderskeid

Verdowende aktiwiteite gee nie energie nie. Oormatige alkohol-inname, eindelose skermblaaiery, of speel om te ontsnap help nie – dit stel net die uitbranding uit.

Wil jy tyd terugwen? Begin hier:

• • Word meer doeltreffend. Lewer meer in minder ure.
• • Sê meer gereeld “nee”. Ons sê “ja” wanneer ons wíl help, nie wanneer ons móét nie.
• • Prioritiseer wat saak maak. Gebruik die 80/20-beginsel of volg die 85%-reël.
• • Vermy doellose vergaderings. Minder praat, meer doen.

Laaste gedagte oor uitbranding

Moenie agter ’n “gerieflike” werk-lewe-balans aanhardloop nie – dis ’n illusie.

As dinge té gemaklik voel, druk jy waarskynlik nie hard genoeg nie – óf in jou werk, óf in jou persoonlike groei. Ware balans kom wanneer die verskillende aspekte doelbewus teen mekaar opgeweeg word, met goeie oordeel te midde van botsende prioriteite. “Werk eerste” of “gesin eerste” as allesomvattende beleide? Dit klink edel, maar in die praktyk is dit swak raamwerke. Konteks maak saak.

As jy proaktief aanpassings maak, kan jy hard druk op ʼn volhoubare manier – sonder om uit te brand, jou gesin op te offer, of jouself te verloor in ’n veeleisende loopbaan.

Marius Vorster dien as die hooftegnologiebeampte (CTO) van Trade Shield, waar hy verskeie tegniese spanne lei wat spesialiseer in die ontwikkeling van finansiële sagteware met ʼn fokus op voorskriftelike analise (“prescriptive analytics”). Met meer as 15 jaar se ervaring in die bou van finansiële stelsels vir betalingspoorte, banke en kredietburo’s, bring hy waardevolle kundigheid na die tafel. Marius is ook ʼn gewaardeerde lid van die Solidariteit IT-netwerk se adviesraad.