Vroue wat bou vir ʼn vry, veilige en voorspoedige toekoms

Wat is ʼn vrou? In vandag se tyd sal daar baie verskillende antwoorde wees. Vir my is ʼn vrou ʼn ma, ʼn ouma, ʼn dogter, ʼn suster en tog sóveel meer! ʼn Vrou is iemand wat sorgloos en natuurlik ʼn verskil in die wêreld rondom haar maak.

Daar is talle vroue wat werk om ʼn toekoms vir ander te bou. Ter viering van Vrouedag, sonder ek graag vyf uitsonderlike vroue deel van die Solidariteit Beweging uit wat daagliks ʼn verskil maak – vroue wat elkeen op hul unieke manier bou aan ʼn vry, veilige en voorspoedige toekoms vir ons almal.

Erna Olivier – ʼn stem van hoop

Erna Olivier dien as adjunkbestuurshoof van Kommunikasie, Bemarking en Verkope by Solidariteit. Sy is verantwoordelik vir die uitvoering van Solidariteit se kommunikasiestrategie en lidmaatskapgroei. Sy bestuur dus die spanne wat Solidariteit se boodskap en dienste aan die publiek oordra.

Deur doeltreffende kommunikasie en bemarking help Erna om Solidariteit se impak in Suid-Afrika uit te brei en die Afrikaanse gemeenskap in te lig oor hul regte, oor opleidingsgeleenthede en gemeenskapsprojekte, en oor relevante nuusgebeure. Haar leiding verseker dat belangrike inligting en hulpbronne die teikengehoor bereik, wat tot ʼn ingeligte en bemagtigde Afrikanergemeenskap bydra. Erna dra uiteindelik by tot ʼn gemeenskap wat selfstandig (vry) en vooruitstrewend (voorspoedig) is en waarin mense mekaar se belange beskerm (veiligheid).

Erna bou vir ʼn hoopvolle toekoms.

Susan Lombaard – ʼn stem vir die stemlose

Susan Lombaard is die uitvoerende hoof van Maroela Media, ʼn toonaangewende Afrikaanse aanlyn nuusplatform. Onder haar bestuur het Maroela Media gegroei tot ʼn webwerf met tussen 1,5 en 2 miljoen unieke lesers elke maand – die grootste Afrikaanse aanlyn nuusplatform. Haar daaglikse werk behels redaksionele leiding, strategiese beplanning en innovasie om lesers met gratis, gebalanseerde nuus en vermaak in Afrikaans te bedien.

Onder Susan se leiding verskaf Maroela Media toeganklike inligting in Afrikaans, wat bydra tot ʼn gemeenskap wat ingelig is. Die platform dien nie net om nuus oor te dra nie, maar bou ook ʼn gevoel van gemeenskap, roeping en hoop onder lesers. Susan dra by tot ʼn vry gemeenskap (met persvryheid en taalgelykheid), ʼn veilige gemeenskap (waar kultuurregte beskerm word) en ʼn voorspoedige gemeenskap (inligting en kennis as grondslag van vooruitgang).

Susan bou sodat ons stemme en stories gehoor word.

Dr. Elsha Hermann – ʼn stem vir die weerloses

Dr. Elsha Hermann is die hoof van navorsing, programme en opleiding by die Solidariteit Helpende Hand Opleidingsinstituut. In dié rol ontwikkel en bestuur sy opleidingsprogramme wat daarop gemik is om gemeenskapslede met praktiese vaardighede en kennis toe te rus. Haar departement doen navorsing oor die behoeftes in die gemeenskap – soos werksopleiding, versorging van bejaardes of kinders en armoedeverligting – en ontwikkel dan kursusse en programme om aan daardie behoeftes te voldoen. Sy is self betrokke by die opleiding van tuisversorgers om mense op te lei om na siekes en bejaardes om te sien en te versorg. Dr. Elsha beskik ook oor gevorderde akademiese agtergrond en gebruik dit om inhoud van hoogstaande gehalte vir opleiding saam te stel.

Haar werk het ʼn tasbare impak op die gemeenskap: deur opleiding en opheffing bou sy die vaardigheidsvlak en selfstandigheid in die Afrikaner-gemeenskap. Haar benadering is vervat in haar eie leuse vir die opleidingsinstituut: “Elke student se hande en hart word tot diens geroep, mag ons by die [Helpende Hand] Opleidingsinstituut nooit moeg word om hulle hande en harte met oorgawe te vorm nie.” Hierdie woorde weerspieël haar toewyding om studente nie net te onderrig nie, maar ook karakter en ʼn diensbare gees te kweek.

Dr. Elsha bou vir ons gemeenskap se welstand.

Melanie Buys – ʼn stem vir ons kinders

Melanie Buys is die hoof van ontwikkeling by die Solidariteit Skoleondersteuningsentrum (SOS). Sy speel ʼn leidende rol in die ontwikkeling van opvoedkundige inisiatiewe en strategieë om Afrikaanse skole en onderwysers te ondersteun. Prakties beteken dit dat sy betrokke is by projekbeplanning vir skole, die uitrol van nuwe onderwysplatforms en die evaluering van onderwysbeleide se impak op Afrikaanse onderrig. Een van die groot inisiatiewe onder haar mede-bestuur is die Wolkskool, ʼn aanlyn leerplatform vir Afrikaanse leerders. Sy fokus daarop om sulke oplossings verder uit te bou, sodat onderrig in Afrikaans nie net tot tradisionele klaskamers beperk is nie. Verder lewer sy gereeld insette oor onderwysbeleid: sy monitor die regering se voorgestelde veranderings (bv. die Bela-wet se implikasies vir skole) en tree as woordvoerder op om skole se regte en outonomie te verdedig.

Melanie het ʼn enorme bydrae tot die beskerming van moedertaalonderrig en skoolgemeenskappe gemaak. Sy bou ʼn veilige omgewing vir Afrikaanse onderwys, ʼn vry gemeenskap wat self oor hul skole en kinders se onderrig kan besluit en ʼn voorspoedigetoekoms omdat gehalte-onderwys die grondslag lê vir die sukses van ons nageslag.

Melanie bou vir ons kinders.

Alana Bailey – ʼn stem vir vryheid

Alana Bailey is die adjunk- uitvoerende hoof van AfriForum. Sy het ʼn agtergrond as geskiedkundige en skrywer, en bring dié kundigheid na AfriForum se strategie vir die beskerming en bevordering van Afrikanererfenis en -regte. In haar rol is sy verantwoordelik vir ʼn wye reeks take: internasionale skakeling behels dat sy met internasionale organisasies en forums skakel om bewustheid te kweek oor Suid-Afrikaanse minderheidsregte; taalsake behels dat sy veldtogte en hofaksies rondom die behoud van Afrikaans lei; en kultuurerfenis beteken dat sy toesien dat geskiedkundige nalatenskappe beskerm en bevorder word.

Alana se werk het ʼn direkte impak op die vryheid, veiligheid en voorspoedigheid van die Afrikanergemeenskap se kultuur en taal. Haar internasionale bewusmakingswerk is ook van groot waarde: deur bande met minderheidsgroepe elders en deur internasionale media toe te spreek, sit sy Afrikanerkwessies (soos plaasmoorde, eiendomsreg en diskriminasie op grond van taal) op die wêreldkaart. Sy help ook om positiewe gemeenskapsprojekte te dryf – van taalfeeste tot geskiedkundige herdenkings – wat trots en hoop in die gemeenskap kweek. Haar breë bydrae verseker dat Afrikaners se taal en kultuur lewend bly, en dat ons regte nie stil-stil afgeskaf word nie.

Alana bou vir vryheid.

Vroue wat saam bou

Hierdie vyf vroue is slegs ʼn enkeles wat bou vir ons toekoms. Hulle is nie net leiers nie – hulle is mentors, rigtingwysers en, bo alles, bouers. Hulle bou nie net omdat dit deel van hulle werk is nie, maar omdat hulle self glo in ʼn toekoms waarin ons en ons kinders vry, veilig en voorspoedig kan leef.

Op hierdie Vrouedag sê ons dankie – vir elke vrou wat help bou aan ʼn hoopvolle toekoms. Elke bietjie maak ʼn verskil!