Vyf dinge wat ek wens ek geweet het toe ek pas begin werk het

Deur Karen Waldeck

Ek onthou nog my eerste werkdag beter as my matriekafskeid. Ek het die vorige aand my klere uitgesit en seker twintig keer gekyk of my alarm gestel is. Ek was opgewonde, maar as ek eerlik moet wees, was ek ook doodbang.

Wat as ek iets verkeerd doen? Wat as hulle uitvind dat ek eintlik niks weet nie? Wat as ek nie goed genoeg is nie? Die snaakse ding is dat niemand jou regtig voorberei vir daardie eerste paar maande van jou loopbaan nie.

As ek vandag kon teruggaan en langs daardie jonger weergawe van myself gaan sit, sou ek waarskynlik net hierdie vyf dinge sê:

1. Jy hoef nie voor te gee dat jy alles weet nie

Ek het lank gedink die slimste persoon in die kantoor is die een wat nooit vrae vra nie. Ek was verkeerd. Die mense wat die meeste groei, is gewoonlik die mense wat nuuskierig genoeg is om te vra: “Kan jy dit asseblief weer verduidelik?”

Niemand verwag dat ʼn nuwe werknemer alles moet weet nie. Hulle verwag net dat jy bereid sal wees om te leer.

2. Moenie jou loopbaan met almal s’n vergelyk nie

Binne ʼn jaar nadat ek begin werk het, het dit gevoel asof almal om my reeds kilometers voor my was. Die waarheid is dat elke mens se tydlyn anders lyk. Dit is belangrik om te onthou dat daardie persoon wat voor jou is, ook eens op ʼn tyd presies was waar jy vandag is.

Solank jy elke dag opdaag en jou beste gee, gaan jy ook een of ander tyd op dieselfde vlak wees, maar almal moet onder begin.

3. Jou eerste salaris gaan jou nie ryk maak nie

En dis heeltemal oukei.

Ek wens iemand het my vroeër geleer hoe belangrik dit is om van dag een af goeie geldgewoontes te ontwikkel. Nie omdat jy reeds baie geld verdien nie, maar omdat die gewoontes wat jy nou vorm, waarskynlik die gewoontes gaan wees waarmee jy oor tien jaar nog leef.

Probeer om goeie geldgewoontes aan te leer terwyl jy nog aan die begin van jou loopbaan is. Dit sal nodig wees om ʼn suksesvolle begroting op te stel, daarby te hou en jou salarisstrokie te verstaan.

4. Verhoudings maak meer saak as wat jy dink

Natuurlik is harde werk belangrik. Maar mense onthou ook hoe jy hulle laat voel. Hulle onthou of jy bereid was om te help, of jy verantwoordelikheid geneem het wanneer jy ʼn fout gemaak het en of jy ander met respek behandel het.

Baie geleenthede ontstaan nie omdat iemand die slimste persoon in die vertrek was nie, maar omdat hulle iemand ken. Dit is dus belangrik om by beroepsnetwerke betrokke te raak en verhoudings te bou met mense wat in dieselfde veld as jy is. Dit sal tot jou voordeel wees in die toekoms.

5. Jy hoef nie hierdie pad alleen te stap nie

Hierdie is waarskynlik die grootste les wat ek geleer het. Toe ek begin werk het, het ek gedink ek moet alles self ontleed. As ek weer kon begin, sou ek baie vroeër van die hulpmiddels wat reeds bestaan, gebruik gemaak het.

Dinge soos Solidariteit se CV- en onderhoudgidse sou my baie onsekerheid gespaar het. Soms is dit nie nóg inligting wat jy nodig het nie; dit is bloot iemand wat al deur dieselfde ervaring is en bereid is om jou in die regte rigting te wys.

As ek vandag weer moes begin sou ek waarskynlik steeds foute maak. Want niemand begin hul loopbaan as ʼn kenner nie. Ons begin almal presies dieselfde: met hoop, ʼn bietjie vrees en baie om te leer. En dalk is dit presies hoe dit veronderstel is om te wees.