Wat jy moet weet oor mediese nalatigheid

Dit is absoluut noodsaaklik dat alle gesondheidswerkers hulself met kennis oor mediese nalatigheid bemagtig. Solidariteit bemagtig nie net gesondheidswerkers deur middel van ʼn omvattende e-leerkursus oor mediese nalatigheid nie, maar beskerm ook sy lede op dié manier. Lees meer!

Deur Nico Strydom

“Mediese nalatigheid het ʼn lewensveranderende impak op mense se lewe. Dit raak nie net die slagoffer vir die res van sy of haar lewe nie, maar ook die gesondheidswerker en die mediese beroep,” sê dr. Alida du Plessis-Faurie, ʼn gekwalifiseerde vroedvrou wat in neonatale verpleging spesialiseer en ʼn kenner op die gebied van mediese nalatigheid is.

Mediese nalatigheid vind plaas wanneer ʼn gesondheidsorgverskaffer se optrede of versuim om op te tree laer is as die aanvaarde standaard van sorg en dit skade vir ʼn pasiënt veroorsaak.

“Voorbeelde nalatigheid is ʼn verkeerde diagnose, onvanpaste behandeling, sorg of aksies, of om na te laat om ʼn pasiënt te waarsku oor die risiko’s van behandeling of sorg,” sê Du Plessis-Faurie.

Mediese nalatigheid het nie net ʼn fisieke en finansiële impak op die slagoffer nie, maar raak die slagoffer ook geestelik en emosioneel. Dit raak egter ook die betrokke gesondheidswerker, die mediese beroep, die departement van gesondheid se begroting en hulpbronne, privaat gesondheid en die algemene vertroue in gesondheidsorg.

Dokters kan in hul persoonlike hoedanigheid vir mediese nalatigheid verantwoordelik gehou word, en indien hulle skuldig bevind word, kan hulle finansieel verantwoordelik gehou word vir die skade. Verpleegsters en aptekers is ook nie immuun teen mediese nalatigheid nie, beklemtoon Du Plessis-Faurie.

“Verpleegsters in privaat praktyk kan byvoorbeeld aangekla word van wanbestuur van geboortes en besering van pasgebore babas, en hulle loop die risiko om strafregtelik aangekla te word. Iets soos die versuim om ʼn baba se kopomtrek te meet, kan tot ʼn eis vir nalatigheid lei wanneer ʼn ouer die hof nader oor ʼn baba met hidrokefalie. ʼn Klein versuim kan tot miljoene rande se skade en ernstige hofsake lei.”

Ook aptekers kan van mediese nalatigheid aangekla word indien hulle byvoorbeeld die verkeerde medikasie resepteer en dit negatiewe of noodlottige gevolge vir die pasiënt het.

“Wanneer gesondheidswerkers van nalatigheid aangekla word, verander dit hul lewe onherroeplik weens die finansiële gevolge wat dit inhou, en veroorsaak ook skade aan hul reputasie en selfvertroue.”

Volgens Du Plessis-Faurie is dit dus absoluut noodsaaklik dat alle gesondheidswerkers hulself met kennis oor mediese nalatigheid bemagtig.

Solidariteit bied gratis toegang vir sy lede tot ʼn kursus wat fokus op die noodsaaklikheid van behoorlike kwantifisering van eise vir mediese nalatigheid om die korrekte vrywaringsdekking in jou versekering te bepaal. Die kursus sal jou help om te bepaal hoe om jou risiko te verminder en jouself en jou praktyk te beskerm.

“Die kursus bied basiese kennis oor mediese nalatigheid, en fokus op wat gesondheidswerkers blootstel. Dit skep ook bewustheid oor die erns van hul taak en hul verantwoordelikheid teenoor die pasiënte wat hulle dien.”

Lede van Solidariteit het gratis toegang tot hierdie kursus en nagenoeg 150 ander wat elke werknemer in sy of haar beroep bemagtig. Om vir voortgesette leer in te skryf, moet jou lidmaatskap aan jou Solidariteit-profiel gekoppel wees. Doen dit hier.