Akademia se Paarl-kampus – ʼn nuwe tuiste vir Afrikaanse hoër onderwys

Solidariteit is opgewonde oor Akademia se onlangse aankondiging oor sy splinternuwe Paarl-kampus wat in Februarie 2026 sy deure amptelik gaan oopmaak. Hierdie nuwe kampus is ʼn merkwaardige mylpaal vir Afrikaanse onderwys en dra by tot ʼn vry, veilige en voorspoedige toekoms vir die Afrikaanse taal- en kultuurgemeenskap. Lees hier meer:

Deur Kyla-Ann du Toit

Opwindende nuus: Akademia se splinternuwe Paarl-kampus maak in Februarie 2026 sy deure oop! Marthinus Visser, besturende direkteur van Akademia, het hierdie aankondiging tydens ʼn Wes-Kaap-hoofdegeleentheid op Dinsdag 11 Februarie 2025 gedoen. Personeel van Akademia en die Solidariteit Skoleondersteuningsentrum (SOS) het ook die geleentheid bygewoon.

“Ons word gedra deur die gemeenskappe in wie se diens ons is dien, en sien uit na die vestiging in die Wes-Kaap. Dit is ons droom om teen 2032 ʼn voorkeurstudietuiste vir méér as 2 000 Fonties (soos wat Akademia-studente na hulself verwys) in dié omgewing te wees, met ʼn voltydse personeelkorps van meer as 100 kundige en ervare personeellede. Intussen vat ons doelgerig hande met die gemeenskap om só die voortsetting van die Afrikaanse universiteitswese te help verseker,” het Visser by dié geleentheid gesê.

Die Paarl-kampus sal in die hartjie van Esterville geleë wees, met die presiese adres wat later bekend gemaak sal word. Hierdie ontwikkeling is deel van Akademia se groter visie om teen 2028 ʼn volwaardige, wêreldklas-kampus in Pretoria te vestig.

Die Paarl-kampus sal ook ʼn belangrike uitbreiding van Akademia se bestaande sentrumnetwerk wees. Dit sluit tans onder meer George, die Paarl en Somerset-Wes in, waar studente reeds deur middel van ʼn nauurse afstandmodel studeer. Die nuwe kampus bring egter ʼn voltydse akademiese ervaring na die Wes-Kaap, soortgelyk aan dié van die Centurion-kampus.

Akademie en studentelewe

Vanaf 2026 sal ongeveer 340 eerstejaarstudente hul akademiese reis op hierdie kampus begin, met toegang tot Akademia se vyf fakulteite en ʼn verskeidenheid kwalifikasies. Studente sal in die 2026- akademiese jaar vir grade in Ekonomiese en Bestuurswetenskappe, Geesteswetenskappe, Natuurwetenskappe, Onderwys en Regte kan inskryf. Prof. Gawie du Toit, tans die dekaan van die Fakulteit Opvoedkunde, sal die hoof van hierdie kampus wees. Du Toit is reeds vir langer as 35 jaar aktief betrokke by die Suid-Afrikaanse hoëronderwyssektor onder meer as navorser, departementshoof, kurrikulumontwikkelaar, programdirekteur en senior bestuurder.

Volgens Visser sal studente voluit aan ʼn aktiewe studentelewe kan deelneem en hul talente op só ʼn wyse ontwikkel dat hulle roepingsgedrewe tot voordeel van hul gemeenskap sal kan leef. “Studentelewe by Akademia het ten doel om ʼn tuiste te skep waar studente se denke én hart in samehang kan ontwikkel en ons is daartoe verbind om, soos reeds die geval is by ons kampus in Centurion, ook in die Wes-Kaap in hierdie ontwikkeling van goed gevormde studente te belê,” sê hy.

Akademia se kampuslewe is daarop gemik om studente akademies en persoonlik te ontwikkel. Die Paarl-kampus sal ʼn volwaardige studenteraad (SR) hê, asook daghuise en uiteenlopende aktiwiteite soos sport, kultuur, gemeenskapsprojekte en sosiale geleenthede bied.

Vooruitgang met kampusontwikkeling

Die kampusfasiliteite word tans ingerig en, as alles volgens plan verloop, sal dit teen Augustus 2025 voltooi wees. Studente kan uitsien na 13 lesinglokale, ʼn mediasentrum, ʼn kafeteria, ʼn Akademia-winkel, saamwerkruimtes en veilige parkering.

Akademia beplan ook ʼn reeks geleenthede in die aanloop tot die opening van die kampus, insluitend ʼn kampusopedag, skoolbesoeke, ʼn toppresteerdersfunksie, asook ʼn vakkeuse-aand en Akademia se deelname aan die Paarl-koorfees ter viering van Afrikaans se eeufeeswording.

“Akademia se uitbreiding na die Wes-Kaap is ʼn bewys van ons verbintenis tot die toekoms van Afrikaanse hoër onderwys,” sê Visser. “Ons bou ʼn toekoms waar studente in hul moedertaal kan studeer en waar Afrikaanse akademiese uitnemendheid floreer.”

Aanlyn studieaansoeke vir die 2026- akademiese jaar sal op 1 April 2025 open.

Solidariteit deel die opwinding met Akademia en sien uit na nóg ʼn wêreldklas-kampus. Ons glo dat kennis die beste manier is om ons gemeenskap te beskerm en daarom is dit nodig om kennisinstellings te bou om die volgende generasie te bemagtig en ʼn vry, veilige en voorspoedige toekoms te verseker.

Lees hier meer oor hoe jy sáám met Solidariteit kan bou.