Die krag van lag en lagterapie

Anja van den Berg

In ons besige lewens is ons skedules tot barstens toe vol weens eise en stres. Soek jy dalk ʼn vinnige, gratis manier om te ontspan net waar jy is? Lag ʼn slag! Dit klink dalk eenvoudig, maar lag het ʼn diepgaande uitwerking op die brein en liggaam. Lag is só kragtig dat daar selfs ʼn terapie rondom dit ontwikkel het.

Lagterapie het die potensiaal om jou lewe en werkservaring te verander. Dit is ʼn kragtige hulpmiddel wat bewys is om stres te verminder, gesondheid te verbeter en geestelike welstand te verhoog. Kom ons kyk na wat lagterapie is, hoekom dit werk en hoe dit jou kan bevoordeel.

Wat is lagterapie?

Lagterapie behels die doelbewuste gebruik van lag om ʼn positiewe fisiologiese en sielkundige effek te bewerkstellig. Anders as spontane lag, word lagterapie beoefen as ʼn doelbewuste oefening, dikwels in groepsverband. Dit begin met diepasemhalingsoefeninge wat vorder na sagte glimlagte en giggels. Daarna gaan die groep oor na ʼn hartlike gelag. Maar hoekom werk dit? Daar is twee redes. Eerstens gaan dit oor die brein se reaksie op lag en tweedens oor sosiale weerspieëling.

Hoekom werk lagterapie?

Die brein reageer dieselfde op gedwonge en spontane lag.

Een van die fassinerende aspekte van lagterapie is dat die brein nie onderskei tussen gedwonge en spontane lag nie. Dr. William Fry, ʼn pionier in lagstudies, het bevind dat die fisiologiese en biochemiese veranderinge wat tydens lag plaasvind, dieselfde is, ongeag of die lag spontaan of doelbewus is.

Spieëlneurone vir empatie en sosiale verbinding

Wanneer mense mekaar dan sien lag, lag hulle dikwels saam sonder om dit eers te besef! Dis ʼn verskynsel wat verklaar kan word deur die werking van spieëlneurone. Hierdie spesiale nabootsneurone word geaktiveer wanneer ons ander sien wat aksies uitvoer of wanneer ons eie aksies by hulle s’n aansluit; wetenskaplikes glo dit is om empatie en sosiale verbinding te bewerkstellig. In lagterapie-sessies help hierdie neurone om ʼn gevoel van samehorigheid en gedeelde ervaring te skep, wat die sosiale en emosionele voordele van die terapie versterk.

Wat is die bewese voordele van lagterapie?

Lagterapie het talle wetenskaplik bewese voordele wat beide jou fisieke en geestesgesondheid kan bevorder.

• • Stresverligting: Navorsing toon dat lag kortisolvlakke (die streshormoon) verminder en endorfiene vrystel, wat ʼn gevoel van geluk en ontspanning bevorder.

• • Verbeterde immuunstelsel: Lag versterk die immuunstelsel deur die produksie van teenliggaampies en natuurlike dodelike selle te verhoog.

• • Pynbestuur: Die vrystelling van endorfiene help nie net met stres nie, maar ook met pynbestuur. Mense wat baie lag, ervaar hoër pynverdraagsaamheid.

• • Beter geestesgesondheid: Lagterapie is ʼn doeltreffende manier om depressie en angs te verminder en jou geestesgesondheid te verhoog.

Hoe pas ek lagterapie toe?

Lagterapie is eenvoudig en kan feitlik oral beoefen word. Hier is ʼn paar stappe om dit in jou daaglikse lewe toe te pas:

1. 1. Begin klein: Jy hoef nie dadelik vir 15 minute aaneen te lag nie. Begin met ʼn paar minute van kunsmatige lag en bou dit geleidelik op. Jy kan selfs ʼn snaakse video kyk om jou aan die lag te kry.

• 2. Sluit aan by ʼn groep: Groeplag-terapiesessies, waar mense saam lag, is dikwels die doeltreffendste manier om te begin. Die gesamentlike lag help om die ervaring te versterk en dit aansteeklik te maak.

• 3. Gebruik dit as ʼn pouse: In plaas daarvan om net ʼn koppie koffie te drink as jy ʼn blaaskans vat, probeer ʼn kort lagsessie. Dit verfris jou verstand en liggaam en gee jou nuwe energie vir die res van jou werksdag.

Hoe neem ek my welstand na hoër hoogtes?

Lagterapie is ʼn eenvoudige maar kragtige praktyk wat groot voordele vir jou liggaam en gees inhou. Of jy nou lang ure werk of in ʼn hoëdruk-omgewing is, lag kan jou help om jou welstand op baie vlakke te verbeter. By Solidariteit glo ons dat jou en jou personeel se welstand die grootste bate is. Raak betrokke by Solidariteit en sluit gratis aan by jou grootste Afrikaanse aanlyn netwerk, want #JyHoortHier!