Jong werkende, leer uit ander se stories oor eerste salarisse

Dit is baie belangrik om jou inkomste reg te bestuur sodat jy nie aan die einde van die maand spyt is dat jou rekening dolleeg is nie. Solidariteit het met verskeie mense gaan gesels om te hoor hoe hulle hul eerste salaris bestee het. Lees hulle stories hier.

Deur Kyla-Ann du Toit

Jou eerste salaris! Dit is baie opwindend om daardie eerste inbetaling ná ʼn maand se harde werk te ontvang, maar jy kan ook vinnig spyt wees indien jy dit nie reg bestuur nie.

Ons het verskeie mense van verskillende beroepe en ouderdomme gevra hoe hulle hul eerste salaris bestee het. Lag saam en kyk of jy iets uit hierdie stories kan leer wanneer dit by geldbesteding kom:

• • “My ma het my aangeraai om lewensdekking uit te neem.” – Marné Pienaar, inhoudkoördineer en skrywer
• • “Ek het dadelik ʼn baie mooi jas by Poetry gekoop.” – Ané Janse van Rensburg, veldtogkoördineerder
• • “Ek het saam met vriende gaan kuier om my eerste salaris te vier.” – Kayla-May Dreyer, webontwikkelaar
• • “Ek het my ouers na ʼn grênd restaurant vir ʼn ete geneem.” – Louis Kriel, taalpraktisyn
• • “Ek het ʼn klomp nuwe klere gekoop.” – Charné Mostert, sosialemediakoördineerder
• • “Ek het R700 verdien en dit alles op ʼn nuwe iPod Nano geblaas.” – Martin Rossouw, grafiese ontwerper
• • “Ek het gaan kuier en myself bederf deur nuwe klere en skoene te koop.” – Jean-Maré Malan, digitale bemarkingsbeampte
• • “Ek het Dischem toe te gaan en verskriklike duur produkte soos vitamine gekoop.” – Jana Ferreira, UX-ontwerper
• • “Ek het onmiddellik my eerste salaris weggesit om te spaar – ek het elke liewe sent gespaar!” – Heleen Nortjé, kommunikasiebeampte
• • “Ek het baie duur, baie hoë en baie ‘fabulous’ hakskoene gekoop.” – Melanie Dorfling, UI-ontwerper
• • “Ek het vir my ouers kaartjies vir Afrikaans is Groot gekoop en ek het ook my naels laat doen.” – Melissa Peyper, kommunikasie- en bemarkingsbeampte
• • “Ek het kaartjies vir Ed Sheeran se konsert gekoop.” – Megan Galvin, administrasiekoördineerder
• • “Ek wou graag my ou kar verkoop en ʼn nuwe een koop, maar nadat ek al my somme gedoen het, het ek besef ek sou nie eers kos kon koop nie. Die grootste skok was om te sien hoeveel belasting afgetrek word – my eerste salaris was R5 000 en ek het R3 500 in my sak gesteek.” – Erna Olivier, adjunkbestuurshoof
• • “My pa het vereis dat ek ʼn goeie mediese fonds kry, en ek het dit gedoen. Ek het wel vir myself gesê dat ek beslis nuwe werksklere met my eerste salaris gaan koop. Ek het toe inkopies gaan doen en ʼn week ná my koopekspedisie het dit my getref: My somme klop nie! Die bedrag wat in my rekening oor was, was nie genoeg vir my medies wat nog moet afgaan nie.” – Lindie de Beer, afdelingshoof
• • “Ek het dadelik vir my ʼn vliegkaartjie gekoop om vir my meisie in die Kaap te gaan kuier.” – Henk du Toit, vlieënier
• • “Ek het saam met my kêrel en ʼn paar vriende die aand uitgegaan en ek het almal se drankies gekoop. Die res van die geld het ek gebruik om kruideniersware te koop en ʼn gedeelte van my huur en elektrisiteit te betaal.” – Inke Kleinhans, haarstilis
• • “My eerste salaris was maar min, so ek kon nie veel doen nie. Ek kon wel kos koop en petrol ingooi, en toe moes ek ook betaal vir nuwe bande vir my kar.” – Christie du Toit, mensehulpbronnebeampte
• • “Ek het dadelik vir myself ʼn bier gekoop. Dit was die ‘tradisie’ in die SAPD wanneer jy jou eerste salaris verdien.” – Johan Kleinhans, polisiekonstabel
• • “Ek het my eerste salaris gebruik om ʼn paar dinge vir my woonstel te koop, soos ʼn mikrogolf, ʼn bank en ʼn yskassie. Ek het ook die volgende dag vir my kollegas elkeen ʼn koffie gekoop.” – Estelle Joubert, onderwyser
• • “Ek het my eerste karpaaiement betaal, ʼn paar kledingstukke gekoop en ek het ook vir my sussie se kinders elkeen ʼn geskenk gekoop wat hulle self kon uitkies.” – Diane Kleinhans, reisagent
• • “Ek het my eerste salaris verdien toe ek in 1986 by een van die Suid-Afrikaanse bataljonne gewerk het. Ek het R105 in kontant verdien. Almal was verplig om ʼn haarsny van R5 te kry, maar kos en verblyf was darem gratis. Ek het toe dadelik kantien toe gegaan en vir my ʼn burger, ʼn koeldrank en ʼn sjokolade gaan koop.” – Johann du Toit, vandag ʼn vlieënier.

Leer uit ander se stories

Hier is beslis ʼn paar stories waaruit jy kan leer! Moenie toelaat dat jou eerste salaris binne ʼn oogwink op is nie. Kyk Solidariteit se begrotingswebinaar en ontvang slim wenke oor hoe jy ʼn doeltreffende begroting kan opstel om jou salaris beter te bestuur. Jy kan ook Solidariteit se gratis begrotingstemplaat aflaai om jou begroting vinnig en maklik op te stel.

Jong werkende, wees van die begin af geldslim danksy Solidariteit!