13 splinternuwe kursusse vir IT-praktisyns

Deur Ané Janse van Rensburg

In vandag se kompeterende arbeidsmark word jou lus om te leer keer op keer beloon. Jou bereidwilligheid om seker te maak dat jou kennis opgeskerp bly en dat jy nuwe vaardighede aanleer, mag dalk net die geheime sleutel wees tot jou sukses in jou beroep!

Solidariteit verwelkom ʼn leergierige gees in die werkplek, daarom het ons 13 splinternuwe kursusse ontwikkel wat jou as IT-praktisyn nie net soos ʼn handskoen sal pas nie, maar wat jou bo die res van jou kollegas sal laat uitstaan!

Kuberkraking in Suid-Afrika

Hierdie kursus, aangebied deur prof. Danny Myburgh, handel oor kuberkraking en kuberveiligheid in Suid-Afrika. Dit dek onderwerpe soos die omvang van kuberkraking, beskerming van jou databasis, en praktiese stappe om kuberaanvalle te voorkom. Dit is ʼn webinaar van twee ure lank wat gratis vir Solidariteit-lede beskikbaar is. Klik hier om die kursus te besigtig.

Inleiding tot Projekbestuur

Hierdie kursus bied ʼn inleiding tot die basiese beginsels van projekbestuur. Dit fokus op die rolle en verantwoordelikhede van ʼn projekbestuurder, noodsaaklike vaardighede en hoe om ʼn span se potensiaal te benut. Die kursus duur twee weke en is aanlyn beskikbaar. Dit kos R9 000, maar is gratis vir Solidariteit-lede.

Bestuur sosiale media

Hierdie kursus leer jou hoe om sosiale media strategies te gebruik om jou persoonlike handelsmerk te bou en dit professioneel te handhaaf. Dit bespreek ook sosialemedia-etiket en hoe om dit in jou werkplek tot jou voordeel aan te wend. Die kursus is ʼn uurlange e-leerprogram, gratis vir Solidariteit-lede.

E-posetiket

Hierdie kursus fokus op die belangrikheid van korrekte e-poskommunikasie. Dit bied 26 riglyne om jou e-posetiket te verbeter, wat sal help om professionele en effektiewe kommunikasie te verseker. Die kursus duur een uur en is gratis vir Solidariteit-lede. Loer hier na die kursus.

Finansiële bestuur van my besigheid

Hierdie kursus dek die basiese beginsels van finansiële bestuur vir klein tot mediumgrootte besighede. Dit sluit onderwerpe soos finansieringsmoontlikhede, boekhouding, begrotings en belasting in. Die kursus duur vier weke en is gratis vir Solidariteit-lede.

Grense in die werkplek

Hierdie kursus beklemtoon die belangrikheid van gesonde grense in die werkplek. Dit bespreek hoe om jou eie grense te stel en ander se grense te respekteer om jou welstand te bevorder. Die kursus duur een uur en is gratis vir Solidariteit-lede. Klik hier om deur te gaan na die kursus.

Kommunikeer effektief met belangegroepe

Hierdie kursus leer vir jou hoe om belangegroepe in ʼn korporatiewe omgewing te bestuur. Dit dek strategieë vir die hantering van verwagtinge en hulpbronoptimalisering om beter resultate te bereik. Dit is ʼn uurlange webinaar, gratis vir Solidariteit-lede. Klik hier om die kursus te voltooi.

Mentorskapopleiding

Hierdie kursus leer jou hoe om effektiewe mentorskap te bied deur verhoudings te bou, gesonde vertroue te vestig en mentorskap teenoor afrigting te onderskei. Dit dek die oorsprong van mentorskap en die verantwoordelikhede van beide mentor en mentee. Die kursus duur een week en is gratis vir Solidariteit-lede.

Microsoft Excel: Basies tot gevorderd

Hierdie kursus leer jou hoe om Excel effektief te gebruik, insluitend formules, datamanipulasie en tabelle. Dit is ʼn noodsaaklike vaardigheid vir enige werk wat data behels. Die kursus duur een week en is gratis vir Solidariteit-lede. Loer hier na die kursus.

Microsoft Word

Hierdie kursus help jou om jou vaardighede in Microsoft Word te verbeter, of jy nou ʼn beginner is of Word gereeld gebruik. Dit fokus op produktiwiteitsverbeterings soos template, indekse en tabelle. Die kursus duur een week en is gratis vir Solidariteit-lede.

Persoonlike handelsmerkbestuur

Hierdie kursus leer jou hoe om jou persoonlike handelsmerk te bou en te bestuur, wat ʼn kragtige hulpmiddel kan wees om nuwe sakegeleenthede te skep. Dit word aangebied deur Elsje van Jaarsveld, en fokus op strategiese selfbevordering om jou loopbaan te versterk. Dit is ʼn uurlange webinaar en gratis vir Solidariteit-lede. Klik hier om deur te gaan na die kursus.

Persoonlike vs. professionele lewe

Hierdie kursus bied praktiese strategieë om ʼn gesonde balans tussen jou werk en persoonlike lewe te handhaaf. Dit sluit oefeninge in om prioriteite duidelik te maak en grense tussen werk en persoonlike aktiwiteite te stel. Dit is ʼn e-leerprogram van een dag en gratis vir Solidariteit-lede.

Slimfoonfotografie

Hierdie kursus leer vir jou die basiese beginsels van slimfoonfotografie. Dit is geskik vir stokperdjiefotograwe, entrepreneurs en bemarkers wat beter visuele inhoud wil skep. Die kursus duur vyf dae en is gratis vir Solidariteit-lede.

Skakel vandag nog in by Solidariteit se aanlyn werksgemeenskap met jou gratis profiel, en kry toegang tot hierdie baanbreker-kursusse !